وابڕیارە سبەینێ کارمەندان و خۆبەخشانی کەرتی تەندروستی لە بەردەمی نەخۆش خانەی فریاکەوتنی پێشوو خۆپیشاندان ئەنجام بدەن دژی دامەزراندنی بەشێک لە کارمەندانی تەندروستی لە شارێکی هەرێم و بێبەش کردنی ئەوانیدیکە.

ئەمڕۆ ٢٣ی نیسان شەممە، هاوژین عوسمان، سەرۆكی سەندیكای كارمەندانی تەندروستی سلێمانی لە لە تۆڕی کۆمەڵایەتی فەیسبووک نوسیوییەتی "بەنهێنی و بە لێشاو دامەزراندنی كارمەندانی تەندروستی لە دهۆك و زاخۆ و سۆران و هەولێر دەكرێت، كەچی بە واستە نەبێت ڕەزامەندی خۆبەخشیش نادەن بۆ سلێمانی و هەڵەبجە و گەرمیان و ڕانیە".

كارمەندانی خۆبەخش و دانەمەزراوی كەرتی تەندروستی لە سلێمانی لە ڕاگەیەنراوێكدا دەڵێن "هەموو خوێندکارێک  كە تەمەنێك خوێندنی كردووە و بڕوانامەی بەدەست هێناوە حەزدەكات و دەیەوێت لەو بوارەی بڕوانامەی هێناوە كاربكات و دابمەزرێت، دەشڵێن وەك ئاگاردان لە ٢٠١٣  وە دامەزراندیان ڕاگرتووە هەر جارە و بە بیناویی قەیرانێك، بەڵام ئێمە پێویستە چیتر بێدەنگ نەبین لە مافی خۆمان، چونكە لەم وڵاتە ماف نادەن دەبێت خۆمان وەریبگرین و هەر كەس لە ئێوە، كە كارمەندی دانەمەزاراوە ئەركە لەسەری بەشداری هەر چالاكیەك بكات، كە بۆ دامەزارندن و وەرگرتنی مافی خۆی بێت".

هەر لە ڕاگەیاندراوەکەی کارمەندانی تەندروستی دا باسی ئەوەش دەکەن کە بەڵگەی پێویستیان لەبەردەستە دامەزراندن دەكرێت بۆ كەسی خۆیان و بە شەخسی دەیكەن بۆ تایبەتیەكانی ناو یەك حزب.

كارمەندانی خۆبەخش و دانەمەزراوی كەرتی تەندروستی لە سلێمانی ئاشكراشیان كردووە، ڕۆژی یەك شەممە ٢٤ی نیسان، لە كاتژمێر ١٠:٣٠ی بەیانی لەبەردەم نەخۆشخانەی فریاكەوتنی كۆن خۆپیشاندانی سەرجەم نەخۆشخانە و بنكەكانی شاری سلێمانی ڕێكدەخرێت بۆ داواكردنی دامەزراندن و بەردەوامی پێدانی ساڵانەی دامەزراندن.