بڕیاره هه‌فته‌ی داهاتوو وەزارەتی دارایی و ئابوری هەرێم دابه‌شكردنی مووچه‌ی مانگی چواری فه‌رمانبه‌ران ده‌ستپێبكاتەوە.
سەرچاوەیەکی ئاگادار لە وەزارەتی دارایی و ئابوری حکومەتی هەرێمی کوردستان لە لێدوانێکدا بە (ئێن ئاڕ تی) راگەیاند" پارەی پێویست بۆ دابەشکردنی موچە لەبەردەستدایە و تەنها بڕێکی کەمی ماوە، کە بە گەڕانەوەی داهاتی ئەم چەند رۆژەی خاڵە سنورییەکان پارەکە دابین دەکرێت".
ئەوەشی خستەڕوو، لە ناوەڕاستی هەفتەی داهاتوو دەست دەکرێت بە دابەشکردنی موچە و پلانەکان بەو جۆرەن، ئەگەر گرفتی هونەر نەبێت سەرەتای هەفتە لیستی مووچە رابگەیەنن.
ڕوونیشیکردەوە، لیستی دابەشکردنی مووچە هاوشێوەی مانگی رابردوو دەبێت و بەهۆی پشووەکانی جەژنەوە نەیانتوانیوە لەم چەند رۆژەدا مووچە دابەش بکەن، جگە لەوەی بەشێکی مووچەخۆران مووچەی مانگی ئازاریان وەرنەگرتووە، بە بیانووی ئەوەی پارە لە بانکەکاندا نەمابوو.