ئەمڕۆ سەڵاحەدین بەهادین، ئەمینداری یەكگرتووی ئیسلامی كوردستان لە بەغدا لەگەڵ جێنین پلاسخارت، نوێنەری تایبەتی نەتەوەیەكگرتووەكان لە عێراق كۆبووەوە. دۆخی سیاسی و ژیانی هەرێمی كوردستان تەوەری سەرەكیی دیدارەكە بوو، بەپێی راگەیەنراوی ئەمینداری یەكگرتوو، لە كۆبوونەوەكەدا سەلاحەدین بەهائەدین رایگەیاندووە "ئەنجامدانی هەڵبژاردنێكی پاك و بێگەرد زامنی پێشكەوتنی پرۆسەی سیاسییە لە هەرێمدا، ئەوەش پێویستی بە میكانیزمی كردەنی و یاسای هەڵبژاردنی دروست و ئیرادەی سیاسی بەهێز هەیە" هەروەها داواشی كردووە نەتەوەیەكگرتووەكان رۆڵی كارا و كاریگەریان لەو پرۆسە هەبێت.

 

راگەیەنراوەكە ئاماژەی بەوەكردووە "ئەمینداری یەكگرتوو وتویەتی  دەبێت بەرژەوەندیی باڵای هاوڵاتییانی كوردستان، پێش هەر بەرژەوەندییەكی دیكەی سیاسی بێت، لەو روانگەیەوە بۆ چارەسەری قەیرانەكان، دەبێت ژیان و گوزەرانی هاوڵاتییان سەنگی مەحەك بێت".

 

ئەمینداری یەكگرتوو رایگەیاند، "هەرێمی كوردستان و هاووڵاتییانی بەدەرنین لە كاریگەریی نەرێنی قەیرانەكانی حوكمڕانی، ئێمە لە یەكگرتوو پێمانوایە ئەنجامدانی هەڵبژاردنێكی پاك و بێگەرد زامنی پێشكەوتنی پرۆسەی سیاسییە لە هەرێمدا، ئەوەش پێویستی بە میكانیزمی كردەنی و یاسای هەڵبژاردنی دروست و ئیرادەی سیاسی بەهێز هەیە".