وەزیری سامانە سروشتییەكانی حكومەتی هەرێم بە وەكالەت رایدەگەیەنێت، لە سێ سەرچاوەوە بەنزین بۆ هاوڵاتیان دابین دەكرێت، بەڵام لەماوەی هەفتەیەكدا ۳ ملیۆن لیتر بەنزین دەخرێتە بازاڕەوە.
كەمال محەمەد ساڵح وەزیری كارەبا و وەزیری سامانە سروشتیەكان بە وەكالەت بە ماڵپەڕی فەرمی حكومەتی هەرێمی كوردستانی راگەیاندووە "خواستی بەكارهێنانی بەنزین لە هەرێمی كوردستان رۆژانە ٥-٦ملیۆن لیترە و وەزارەتیش لە سێ سەرچاوە بەنزین دابین دەكات، ۱ ملیۆن لیتری لە پاڵاوتگەی (كار) و یەك ملیۆن و ٥۰ هەزار لیتری دیكە بەپێی ڕێكەوتنێكی نێوان وەزارەتی سامانە سروشتیەكان و وەزارەتی نەوتی عێراق و ئەوی دیكە لە دەرەوەی هەرێم هاوردە دەكرێت، بەڵام ئەوەی تایبەتە بە عێراقەوە ٤٥ ڕۆژە ناردنی ئەو بەنزینە ڕاگیراوە، نرخی جیهانیی بەنزینیش گران بووە و خواستی بەنزین لەعێراقیش زیاد بووە".
ناوبراو ئاماژەی بەوەكردووە، لەسەر ڕاسپاردەی سەرۆك وەزیران و لەپێناو بەرژەوەندی گشتی و كۆنترۆڵكردنی نرخی بەنزین، ئەنجومەنی وەزیران دەسەڵاتی بە وەزارەتی سامانە سروشتیەكان داوە چەند بڕیارێكی گرنگ دەربكات، لەوانە دابینكردنی ۲ملیۆن لیتر بەنزین بۆ هەولێر و دهۆك و دابینكردنی زیاتر لە ۱ ملیۆن لیتر بەنزینی دیكە بۆ سلێمانی و هەڵەبجە و لەگەڵ كۆمپانیایەكیشدا ڕێككەوتووین كە ۲ تا ۳ ملیۆن لیتر بەنزینی دیكە دابین بكات.
كەمال محەمەد وتویەتی "پێشبینی دەكرێت لەماوەی هەفتەیەكدا ۳ ملیۆن لیتر بەنزین بخرێتە بازاڕەوە، بۆ هەر لیترێكی بەنزین ۱۲۰۰ دینار لەسەر حكومەت دەكەوێت و ٤۰۰ دینار پاڵپشتی دەكرێت بۆ ئەوەی نرخەكەی بۆ ٨۰۰ دینار دابەزێت، بەمەش بۆ ۳ ملیۆن لیتر بەنزین ڕۆژانە ملیارێك و ۲۰۰ ملیۆن دینار پاڵپشتی حكومەتە بۆ نرخی بەنزین".