وەزارەتی بازرگانی و پیشەسازی هەرێمی کوردستان ڕایگەیاند "كار دەكەن ئەو بەشە خۆراكەی كە دێت لە زووترین كاتدا بگاتە دەستی هاووڵاتیان:".

ئەمڕۆ چوار شەممە ٧ ی ئەیلولی ٢٠٢٢، وەزارەتی بازرگانی و پیشەسازی ڕاگەیاندراوێکی بڵاوکردەوە کە سەروەر كەمال هاواری، بریكاری وەزارەت بۆ كاروباری بازرگانی، لەگەڵ تیمی وەزارەت تایبەت بە بابەتی بەشە خۆراكی هاووڵاتیان كۆبووەتەوە و لە کۆبوونەوە کەدا بە وردی باس لە گرفت و كێشەكان كرا، بڕیاریشە كاری جدی بكرێت ئەو بەشە خۆراكەی لە حكوومەتی فیدڕاڵەوە دێت لە زووترین كاتدا بگاتە دەستی هاووڵاتیان.

كۆبوونەوەكە بە ئامادەبوونی بەرێوەبەری گشتی دیوان و بەڕێوەبەری گشتی بازرگانی و نوێنەری وەزارەتی دارایی ئەنجام درا.

بریكاری وەزارەت بۆ کاروباری بازرگانی، ئاماژەی بەوەكرد " ئەو گلەییانەی دەكرێت لەسەر جۆر و كواڵێتی و بڕی خۆراكی مانگانە، پەیوەندی بە وەزارەتی بازرگانی و پیشەسازی هەرێمی کوردستان نییە و راستەوخۆ لە حكوومەتی فیدڕاڵەوە دێت و پەیوەندی بەوانەوە هەیە و وەزارەتی بازرگانی و پیشەسازی هەرێمی کوردستان تەنیا هۆکارێکە بۆ دابەشكردن و گەیاندنی بەشەخۆراك بە هاووڵاتیان".

دەشڵێت "بوونی هەر گرفتێك لەبەردەم ئەو دابەشكردنەدا کە پەیوەندیی بە ئێمەوە هەیە، پێویستە بە هەموو لایەك هەوڵ بدەین لە زووترین كاتدا ئەو بڕە خۆراكە بگاتە هاووڵاتیان و لە كۆكاگاندا نەمێننەوە".

لە ڕاگەیاندراوەکە جەخت کراوەتەوە، پاش گوێگرتن لە سەرجەم بەڕێوەبەران و ئامادەبووان، بڕیار درا لە رێگەی چەند لیژنەیەكەوە چارەسەری كێشەكان بكرێن.

نەوزاد شێخ كامیل، بەڕێوەبەری گشتیی بازرگانی لە وەزارەتی بازرگانی و پیشەسازیی حكوومەتی هەرێمی كوردستان، ڕاگەیاند "بەشەخۆراكی حەوتەم هاتووە و دەست بە دابەشكردنی بەسەر بریكارەكان و هاووڵاتییاندا كراوە".

ناوبراو باسی لەوەشکرد، ئەو  مادانەی دێت دابەش دەکرێت، هیچ خۆراك و بەشەخۆراكێك نافەوتێت و ئەوەی دێت دابەشی دەكەین، بەڵام هەندێك جار دوادەكەوێت، بۆ نموونە، لە شارێك مادەیەكی خۆراك دراوە، لە شارێكی دیكە نەدراوە، بەڵام لەكۆتاییدا هەر دێت و دابەشی دەكەین".