وتەبێژی بازاڕی دۆلارەكەی سلێمانی رایدەگەیەنێت، نرخی دۆلار بەرامبەر دیناری عێراقی لەوە زیاتر بەرز نابێتەوە كە ئێستا هەیە و هۆكارەكەشی بۆ باشیی دۆخی ئابووریی عێراق دەگەڕێنێتەوە.
جەبار گۆران، وتەبێژی بازاڕی دۆلارەكەی سلێمانی بە (سپی)ی راگەیاندوە، بەهۆی ئەوەی سەرچاوەی سەرەكی دارایی عێراق لە نەوتەوەیە و نەوتیش نرخی بەرزە، بۆیە لە ماوەی رابردوودا ئابووریی عێراق گەشەی باشی كردووە و هەر ئەوەش دەبێتە هۆی بەهێزیی دینارەكەی.
ناوبراو روونیكردۆتەوە، ئێستا لە بانكی ناوەندیی عێراق 96 ملیار یەدەگی دۆلار و نزیكەی 134تۆن زێڕ هەیە كە ئەوانە دەبنە پاڵپشتییەكی باش بۆ بەهێزیی دیناری عێراقی، بۆیە 100دۆلار ئەگەر ببێتە 155هەزار دیناریش، كاتی دەبێت، نرخی 100 دۆلار نابێت لە 149 هەزار دینار زیاتر بێت.
هەروەها وتویەتی "ئێمە لە كوردستان نزیكەی 2200 كۆمپانیای ئاڵوگۆڕی دراومان هەیە، دەمێكە داوا لە بانكی ناوەندیی عێراق دەكەین بەشێك لەو دۆلارەی دەیخاتە بازاڕەوە كە نرخەكەی بۆ 100 دۆلار 146 هەزار دینارە، بە كۆمپانیاكانی دراو لە كوردستانی بفرۆشێت، بەڵام تاوەكو ئێستا داواكەیان جێبەجێ نەكردووین".