نوێنەری عێراق لە ئەنجوومەنی ئاسایشی نێودەوڵەتی ئاماژەی بەوەداوە کە عێراق و هەرێمی كوردستان دەیانەوێت كێشەی مووچە چارەسەر بكەن و دەشڵێت" عێراق ڕێگە بە هیچ لایەنێك نادات كێشە بۆ سەقامگیری و ئاسایش و سەروەری دروست بكات".
د. عەباس كازم، نوێنەری عێراق لە كۆبوونەوەی ئەمڕۆی ئەنجوومەنی ئاسایش ڕایگەیاند،" عێراق و هەرێمی كوردستان لە هەوڵدان بۆ دەستپێكردنەوەی هەناردەوی نەوت''.
ڕاشیگەیاند'' عێراق و هەرێمی كوردستان دەیانەوێت كێشەكان بەپێی دەستوور چارەسەر بكەن و هەردوولا دەیانەوێت كێشەی مووچە چارەسەر بكەن''.
ئاماژەی بەوەشكرد، توانای هێزە ئەمنییەكانی عێراق زۆر باش بووە و هەوڵەكانی عێراق بۆ ئەوەیە دۆخی ئاسایش و گوزەرانی هاوڵاتیان باشتر بكرێت.
جەختیشی كردەوە، دەبێت سەرجەم هەوڵەكان بۆ ڕاگرتنی دەستدرێژییەكان بخرێنەگەڕ، چونكە ئەو دەستدرێژیانە ئاسایشی عێراق و خەڵكەكەی دەخەنە مەترسییەوە.
وتیشی'' عێراق ڕێگە بە هیچ لایەنێك نادات كێشە بۆ سەقامگیری و ئاسایش و سەروەری دروست بكات''.