ئەندامێکی پەرلەمانی عێراق ڕایگەیاند" بەربەستەکانی بەردەم چارەسەرکردنی کێشەی مووچەی هاوڵاتییانی هەرێم لابراون، پێویستە هەرێم درێژە بە كۆبوونەوەكانی لەگەڵ بەغدا بدات".
بڕیار ڕەشید، ئەندامی فراكسیۆنی یەكێتی لە پەرلەمانی عێراق ڕایگەیاند" لە سەرەتای هەفتەی داهاتوو ئامادەکاری دەکرێت بۆ دابەشکردنی مووچەی مانگی سێ، دوای ئەوەی بەربەستەکانی بەردەم چارەسەرکردنی گرفتی مووچەی هاووڵاتییانی هەرێم لابراون".
ئاماژەی بەوەشکرد، ئومێدەوارم هیچ لایەنێکی سیاسیی عێراق و کوردستان چارەسەری کێشەی مووچەی هاووڵاتییان بە هەرەشە بۆ سەر پێگە و سەنگی خۆی نەزانێت.
بڕیار ڕەشید ئەوەشی خستەڕوو، هەوڵەکانمان بەردەوامی دەبێت، هێشتا بابەت گەلێک هەن لە نێوان هەرێم و بەغدا کە پێویستی بە هەوڵ و کۆششی هەموو لایەکە بۆ چارەسەربوون.
دووپاتیشیدەكاتەوە، گرنگە شاندی هەرێم لە بەغدا دانەبڕێن و "کۆبوونەوەی بەردەوام" هەبێت بۆ ئەوەی کێشەکانی نێوان بەغدا و هەرێم کەڵەکە نەبن و زوو بتوانرێت هەماهەنگی بۆ چارەسەرکردنیان دروستبکرێت.