نووسینگەی مەسعود بارزانی، سەرۆكی هەرێمی كوردستان روونكردنەوەیەك لەسەر مستەفا سەید قادر، وەزیری پێشمەرگەی هەرێمی كوردستان بڵاودەكاتەوە.
لە روونكردنەوە هاتوە: لەسەرەتای پەلاماری داعش بۆ سەر كوردستان و گرتنەبەری ستراتیژیی بەرگری و پاشان ستراتیژیی پەلاماردان بۆ سەر تیرۆریستان لە گشت میحوەرەكانی رووبەڕووبوونەوەدا، وەزیری پێشمەرگە ئاگاداری پلانەكانە، رۆژانە و سات بە سات لەگەڵ هێزی هاوپەیمانان لە پەیوەندی و هەماهەنگی بەردەوامدایە و زۆر سەركەوتووانە كاروباری وەزارەت و ئەركی پاڵپشتیكردنی هێزەكانی پێشمەرگە بەڕێوەدەبات".
دەقی روونكردنەوەكە:
ڕوونكردنەوەیەك لە نووسینگەی سەرۆكی هەرێمی كوردستان
ماوەیەكە لە هەندێ نووسین و لێكدانەوەی ناو میدیا و ڕاگەیاندنەكاندا هەوڵی شێواندنی سەركەوتنەكانی پێشمەرگە و كەمكردنی بایەخی ئەو سەركەوتنانە دەدرێت و داخلەدڵانە باس لەوە دەكرێت كە بەڕێز وەزیری پێشمەرگە لە بەرەكاندا دیار نییە و ئاگاداری پلان و هێرشەكانی هێزی پێشمەرگە لە بەرەكانی شەڕ نییە.
لێرەدا بە گشت لایەك ڕادەگەیێنین كە هەر لەسەرەتای پەلاماری داعش بۆ سەر كوردستان و گرتنەبەری ستراتیژیی بەرگری و پاشان ستراتیژیی پەلاماردان بۆ سەر تیرۆریستان لە گشت میحوەرەكانی ڕووبەڕووبوونەوەدا بەڕێز وەزیری پێشمەرگەی حكوومەتی هەرێمی كوردستان ئاگاداری پلانەكانە. ڕۆژانە و سات بە سات لەگەڵ هێزی هاوپەیمانان لە پەیوەندی و هەماهەنگیی بەردەوامدایە و زۆر سەركەوتووانە كاروباری وەزارەت و ئەركی پاڵپشتیكردنی هێزەكانی پێشمەرگە بەڕێوە دەبات.
نووسینگەی سەرۆكی هەرێمی كوردستان
24ـی 12ـی 2014