لە یاداشتێکدا کە پەرلەمانتاری ناسراو د. مەهدی حافز سەرۆکی کەمپینەکەیە، داوا لە جبوری و عەبادی دەکەن کە رێککەوتنی نێوان بەغداو هەولێر هەڵوەشێننەوە، چونکە لە قازانجی هەرێمە.
ئەو یاداشتە کە بۆ سەرۆکایەتی پەرلەمان و سەرۆکایەتی حکومەت و پەرلەمانتاران و ئەنجومەنی وەزیرانی عێراق نێردراون، زۆر بەڕاشکاوانە داوا دەکەن کە ئەو رێککەوتنەی ٢-١٢-٢٠١٤ لە نێوان بەغداو هەولێردا لەسەر پرسی نەوت و بوودجە ئەنجام درا هەڵبوەشێنرێتەوەو " چونکە زەرەری عێراق‌و قازانجی هەرێمی کوردستانی تیایە"و، سەرلەنوێ دەست بە گفتوگۆ بکرێتەوە.
ئەو یاداشتە کە ئیمزای ٢٠ ئابوری ناسی عێراقی لەسەرەو ٢٠-١٢-٢٠١٤ نوسراوەو سپی میدیا بینیویەتی، لە ناوەرۆکەکەیدا داوا دەکات کە دەبێت رۆژانە هەرێم ٥٥٤ هەزار بەرمیل نەوت لە بەرهەمبهێنێت و لە ڕێگای سۆمۆوە بفرۆشرێت، ئینجا لە بودجەی عێراق بڕی لە١٧% یان پێ بدرێت.
هەروەها لە بڕگەیەکی تری یاداشتەکەدا هاتووە کە کۆی ئەو نەوتەی هەریم بەرهەمی دەهێنێت بە سوتەمەنییە ناوخۆییەکان بخرێتەوە سەر عێراق و ئەو رێژەیەی کە بۆیان دیاریکراوە بۆ بەکارهێنانی ناوخۆی بیاندرێتێ.
پێشبینی دەکرێت کە ئەم گرووپە لەناو پەرلەمانی عێراقیش کەمپینی بۆ بکەن بۆ ئەوەی بکرێتە بابەتێکی پەرلەمان و لە دانیشتنەکانی پەرلەماندا قسەی لەسەر بکرێت و یڕیاری لە بارەوە بدرێت.
حکومەتی فیدراڵ و حکومەتی هەرێم رۆژی ٢-١٢-٢٠١٤ رێککەوتن لەسەر ئەوەی کە هەرێم رۆژانە ٢٥٠ هەزار بەرمیل نەوت هەناردەی دەرەوە لەرێگای سۆمۆ ( تاکە کۆمپانیای فرۆشتنی نەوتی عێراق) بکات.
هەروەها لە بیرە نەوتەکانی کەرکوکیش هەرێم رۆژانە بڕی ٣٠٠ هەزار بەرمیل نەوتی بەرهەم هێنراو، هەردووکیشیان لە هێڵی هەرێمی کوردستانەوە بنێرێت بۆ بەندەری جیهانی تورکی.