حیزبی شیوعی رایگەیاند" ئەو دەرئەنجامەى هەڤاڵانى یەکێتى پێى گەیشتوون دەرئەنجامێکى دڵخۆشکەرە".
ئەو لێدوانەی وتەبێژی حیزبی شیوعی بابە عەلی لە چوارچێوەی ئەو کۆنگرە رۆژنامەوانییەدا بوو کە ئەمڕۆ دوای کۆبوونەوەی یەکێتی و حیزبی شیوعی لەهەولێر سازکرا.
سەعدی پیرە ئەندامی مەکتەبی سیاسی یەکێتی لەو کۆنگرە رۆژنامەگەریەدا وتی " خاڵى هاوبەشى هەموو لایەنەکان ئەوەیە کە چۆن بتوانین بارودۆخى کوردستان ئاسایى بکەینەوە و لە چوارچێوەى یاسا مامەڵە لەگەڵ یەکتر بکەین".
پیرە ئەوەشی ئاشکرا کرد لە چەند ڕۆژى ئایندەدا لەگەڵ هەموو لایەنەکان سەرلەنوێ کۆدەبینەوە.
ئەو ئەندامەی مەکتەبی سیاسی یەکێتی وتیشی" ئێمه له‌هه‌رێم قه‌یرانی گه‌وره‌ی ئابوری و مووچه‌ی فه‌رمانبه‌رانمان هه‌یه، له‌لایه‌كی تره‌وه وه‌زیفه‌ی نیشتمانی و نه‌ته‌وه‌یمان هه‌یه له‌باكور و رۆژئاوا، بۆیه ده‌بێت حكومه‌تی هه‌رێم كاری جدی بكات و هه‌وڵی زیاتر بدات بۆ بنه‌بڕكردنی".
بابە عەلی ئەندامی مەکتەبی سیاسی حیزبی شیوعیش وتی" پێشتر له‌هه‌رێم قه‌یرانی سیاسی و شه‌ڕی ناوخۆ هه‌بووه به‌ڵام ئێستا قه‌یرانی ناوخۆی و حكومداری هه‌یه قه‌یرانی متمانه‌ی نێوان خه‌ڵك و حكومه‌ت هه‌یه گه‌یشتووه‌ته راده‌یه‌ك هاووڵاتیان متمانه‌یان به ده‌سه‌ڵات نه‌ماوه."
ئەو کۆبوونەوەیە لەچوارچێوەی ئەو کۆبوونەوانەدایە کەیەکێتی بەمەبەستی چارەسەرکردنی بارودۆخی سیاسی و یاسایی لەگەڵ لایەنەکاندا سازی دەکات.