كوڕی بەرپرسێكی پارتی دیموكراتی كوردستان لە ئاهەنگی یادی لەدایك بونیدا لە باخەكەی لە سەیرانگای مێرگەپان دەكوژرێت.
عەلی حەمەی مام عەلی كە ماوەی دوو ساڵە لە سوید گەڕاوەتەوە كوردستان، دوێنێ 2/7 لە كاتی ئاهەنگی یادی لەدایكبونیدا لە مێرگەپان لەگەڵ چەند هاوڕێیەكیدا بە تاپڕ نیشانە دەشكێنن و لەو كاتەدا هاوسەری یەكێك لە هاوڕێ كوڕەكانی لە نیشانە نانەوەدا فیشەكێكی لەدەست دەردەچێت و بەر كوڕی بەرپرسەكەی پارتی دەكەوێت و دەمودەست دەیكوژێت.
عەلی ساڵی 1974 لە سلێمانی لەدایك بووە و كوڕی حەمەی مام عەلی بەرپرسی پێشووی دەزگای پاراستنی لقی چواری پارتییە و خێزاندارە و خاوەنی كچ و كوڕێكە و ئێستا هاوسەر و منداڵەكانی لە سوید دەژین و خۆشی لە مەرزی نێودەوڵەتی باشماخ كاردەكات.
سەرچاوەیەكی نزیك لە بنەماڵەی عەلی بە سپی میدیای ڕاگەیاند كە ئەمشەو باوكی و سەرجەم ئەندامانی خێزانەكەی دەگەڕێنەوە سلێمانی و حەمەی مام عەلیش داوای كردووە كە دەستكاری تەرمەكەی نەكرێت و تا كاتی گەڕانەوەیان لە پزیشكی دادوەری سلێمانی بمێنێتەوە.