قوباد تاڵەبانی، كوڕی جەلال تاڵەبانی، سكرتێری گشتی یەكێتی نیشتمانی كوردستان، لە پەیامێكدا كە ئاڕاستەی باوكی كردوە دەڵێت "دەبێت ڕێكەوتنی یەكێتی و گۆڕان جێبەجێ بكرێت".
قوباد تاڵەبانی، كوڕی جەلال تاڵەبانی، كە هاوكات جێگری سەرۆكی حكومەتە بەبۆنەی یادی 42 ساڵەی دامەزراندنی یەكێتی پەیامێكی ئاڕاستەی باوكی كرد و تیایدا پێداگری دەكاتەوە لەسەر جێبەجێكردنی رێككەوتننامەی نێوان گۆڕان و یەكێتی.
دەقی پەیامەكەی قوباد تاڵەبانی
لەیادە مەزنەكەدا، پەیامێك بۆ مامی مەزن
سڵاو باوكە گیان، هەڤاڵ مام جەلال
ئەمڕۆ هەموومان پێكەوە یادی پڕ شكۆی ئەو حزبە مەزنە دەكەینەوە، كە 42 ساڵ لەمەوبەر لەگەڵ هاوڕێ‌‌و هاوڕێبازەكانت لەدژوارترین بارودۆخدا كۆڵەكەكەیتان دامەزراند، ئەوەی ئێوە كردتان تەنیا دروستكردنی هێزێكی سیاسی‌‌و چەكداری و پارتیزان نەبوو، بەڵكو بەهەموو مانایەك هەڵگیرساندنی شۆڕشێكی نوێ بوو، شۆڕشێك كە هەموو خەڵكی كوردستان پشتیوانیان كرد هەر لەشوێنكردنەوه و بەشكردنی پارووە نان، تادەگاتە گیانبەخشین، بۆیە لەمڕۆژەدا پیرۆزبایی لەتۆ و هەموو كەسوكاری سەربەرزی شەهیدان و پێشمەرگه و كەمئەندامانی سەنگەر و زیندانییە سیاسییەكان و رێكخستنە دێرینەكان و هەموو هەڤاڵانی یەكێتی نیشتیمانی و گشت خەڵكی كوردستان دەكەم.
خۆشبەختییەكی گەورەیە كە مەشخەڵەكەی ئێوە تائێستاش گڕەی دێت‌و وەك خۆت فەرمووت یەكێتییەكان بەهەق سەلماندیان "سەفین لەبن دێ، بەڵام یەكێتی لەبن نایێ".
وەك چۆن جەنابت لەرۆژە سەخت و دژوارەكاندا هەمیشە هیوا و گەشبینیت دەبەخشییەوە، پڕ بەدڵ حەزم دەكرد منیش ئەمڕۆ لەم نامەیەدا مزگێنی باشیی بارودۆخی سیاسی و ئەمنی و ئابوری و مرۆییت پێبدەم، بەڵام بەداخم بەو شێوەیە نییه و دڵنیام هەموو شتێك بەدڵی تۆ نییە، بێهیوایی لەهەندێ رەفتار و گفتار هەندێجار زۆربەمان دەگەیێنێتە ئەو بڕوایەی بڵێین ئەم بارە لارە تەنیا بەگۆچانەكەی مام راست دەكرێتەوە.
پڕ بەدڵ حەزمان دەكرد بارودۆخی حوكمڕانیمان بەشێوەیەك بووایە كە خزمەتی زیاتری خەڵكی كوردستانمان بكردایە و گوزەرانێكی شایسته و گونجاومان بۆ هەمووان دابین بكردایە، بەڵام زروفی شەڕ و قەیرانی ئابوری لەدەرەوەی ئیرادەی خۆمان بارودۆخەكەی شێواند و بوونە مایەی بارگرانی بۆ خەڵك، بەدڵنیاییەوە ئەمەش خەتای ئێمەی تێدایە و وەك چۆن شانمان داوەتە بەر باری ئەو ئەركە، دەبێت بەرپرسیارێتییەكەشی هەڵبگرین.
مامە گیان، ئێوە بۆ من تەنیا باوكێك نەبوون، بەڵكو مامۆستا و خوێندنگا و رێبازێك بوون كە شوێنكەوتنی هەمیشە مایەی شانازی و سەربەرزییە، ئەگەر سەركەوتنێكمان بەدەستهێنابێت لەچاوی حیكمەت‌و دنیابینی تۆ دەیبینین، ئەگەر دوچاری شكستێكیش هاتبین ئەوا بەهۆی غیابی تۆوەیە كە حەوسەڵە و ئۆقرەیی لێ بڕیوین.
ئەو مێژووە پڕ شكۆیەی ئەمڕۆ یەكێتی پێی گەیشتووە، لەسێبەری فەلسەفەی بەڕێوەبردنی تۆدایە، هەر تۆ فێرت كردین وڵاتمان لەخۆمان زیاتر خۆش بوێت و یەكێتی نەكەینە ئامانج، بەڵكو وەسیلە بێت بۆ خزمەتكردنی كۆمەڵانی خەڵكی كوردستان.
هەرچەندە هەموومان سورین لەسەر پەیام و ئامانجەكەت، بەڵام ساڵ بەساڵ پشوودان و غیابی تۆ زیاتر پێوەمان دیاری دەدات، ئێستا لەوە تێدەگەین چۆن لەچەقی قەیرانەكاندا بەهەنگاوێكی ژیرانە ئاشتەواییتان دەخستە نێوماڵی كورد و دڵی هەموو خەڵكیتان خۆش دەكرد.
لەدوای ساڵانی شەڕی ناوخۆ، ئەوەندە بەس بوو بۆ ئەوەی حیكمەت و مەردایەتی بنوێنیت و بەدوو ئۆتۆمبێلەوە روو لەسەری رەش بكەیت و لەگەڵ كاك مەسعود خاك و ئیدارەی باشووری كوردستان یەك بخەیتەوە.
پاش ماوەیەك لەنیگەرانی و دڵئێشان، هەر تۆ بوویت لەگەڵ كاكە نەوەی رۆح شادی هاوخەبات و هاوسەنگەرت ئاشتبوونەوەی یەكێتی و گۆڕانتان راگەیاند و رێككەوتننامەیەكی نیشتیمانیتان هێنایە بەرهەم.
زۆر بەداخم كە ئەمساڵ لەكاتێكدا یادی یەكێتی دەكەینەوە كە هاوڕێی دێرینی تۆ و یەكێ لەدامەزرێنەرانی حیزبەكەمان، كاكە نەوە جێی هێشتوین، چاومان لەسەر ئەوە بوو ئەمساڵیش وەك پار بەحزوری جەنابت بهاتایە بەشداری خۆشییەكەی لەگەڵ بكردینایە و لەگەڵ هاوخەباتە دێرینەكانیدا دەستی سەركەوتنیان بەرز بكردایەوە، بۆیە وەك پێشتریش وتومە، وەفاداری بۆ مام جەلال و كاكە نەوە بەوە دەبێت رێز لەئیمزاكەیان بگرین و رێككەوتننامەی یەكێتی و گۆڕان وەك ئەوەی ئەوان خواستیان بوو جێبەجێ بكەین.
باوكە گیان، راستە غیاب و پشووی ناچاریی تۆ هەموومانی شەكەت كردووە، بەڵام بەوە سەربەرزین فێری خۆڕاگری و تۆكمەییت كردوین و رێبازێكت داڕشتووە كە چەند بكەوین بەهێزتر هەڵدەستینەوە و درێغی ناكەین لەخزمەتكردن لەپێناو خێروخۆشی و تەبایی كۆمەڵانی خەڵكی كوردستان.
سوپاس كە هەمیشە پشتیوانمان بوویت، لەوەفای ئەو دڵسۆزییەی تۆشدا بەهەزاران كادیر و لایەنگری چست و چالاكی یەكێتی نیشتمانی كوردستان بەڵێنی دڵسۆزی بۆ رێبازەكەت دووپات دەكەنەوه و دڵنیابە كۆڵ نادەین تا یەكێتی و كوردستان دەبەینەوە سەر لوتكەی سەركەوتنەكان.