بەهرام قاسمی گوتەبێژی وەزارەتی دەرەوەی ئێران، هەڵوێستی فەرمیی وڵاتەكەی لەبارەی بڕیاری بەڕێوەچوونی ریفراندۆم لە كوردستان دەربڕی كە بڕیارە لە ٢٥ی ئەیلوول بەڕێوە بچێت.

وتی "هەڵویستی ئاشكرا و بنچینەیی ئێران لەبارەی عێراق، پشتیوانیكردنە لە پاراستنی یەكپارچەیی وڵات."

بەگوێرەی ماڵپەڕی فەرمیی وەزارەتی دەرەوەی ئێران، قاسمی لە بەشێكی تری قسەكانیدا دەڵێت، هەرێمی كوردستان بەشێكە لە خاكی عێراق و بڕیاری یەكلایەنە و بەدەر لە رێسا دەستووری و نیشتمانییەكان، لە دۆخی ئاڵۆزی ئێستەی عێراق و ناوچەكە ناسەقامگیری و كێشەی زیاتری لێ دەكەوێتەوە.

هەروەها دەڵێت، عێراقێكی یەكگرتوو و یەكپارچە و دیموكراتیك پارێزەری بەرژەوەندییەكانی خەڵكی عێراقە و ئەمڕۆ زیاتر لە هەر كاتێكی تر پێویستی بە ئارامی و سازانی نیشتمانی هەیە، ناكۆكییەكانی هەولێر و بەغداش دەبوو لە چوارچێوەی دیالۆگ و گفتوگۆ و بەگوێرەی دەستوور چارەسەر بكرێن.