وێنەى ئەو سێ پێشمەرگەیەی ئەمشەو لە کاتى بەرەنگاربوونەوەى هێرشەى داعشدا شەهیدبوون بڵاوکرایەوە.
ئەمشەو چەکدارانى داعش هێرشیان کردووەتە سەر سەنگەرەکانى فەوجى کاکەییەکانى هێزى پێشمەرگە لە داقوق و پێشمەرگە بەرەنگاریان بوونەتەوە و هێرشەکەیان تێکشکاندوون.
هەروەها بەهۆى ئەو هێرشەوە ٣ پێشمەرگە شەهیدبوون و ٧ پێشمەرگەش برینداربوون کە دوانیان ئەفسەرن، بەڵام زیانى چەکدارەکانى داعش تا ئێستا نەزانراوە.
ئەو سێ پێشمەرگەیەی ئەمشەو شەهیدبوون بە ناوەکانى ئەرکان وەلی و فەلاح کەریم و مەسعود خالد هەر سێکیان دانیشتوى خانەقینن.
ئەوەش لەکاتێکدایە پێشتر چەکدارەکانى داعش چەند جارێک هێرشى کردبووە سەر سەنگەرەکانى پێشمەرگە و بەو هۆیەشەوە چەند پێشمەرگەیەک شەهید و برینداربوون.
شەوى ٢٧ى حوزەیرانى ٢٠١٧ لە گوندی لهێبى سەر بە قەزای داقوق کە کەوتووەتە باشووری شاری کەرکوکەوە، چەند چەکدارێکی داعش هەڵیانکوتابووە سەر ئەو گوندە ٤ هاووڵاتییان شەهیدبکردبوو، کە ٣ کەسیان ئەندامی خێزانێکی کاکەیى بوون و هەروەها ئەو چەکدارانەى داعش ٣ هاووڵاتیى تریان فڕاندبوو، کە ئەندامى هەمان خێزان بوون.