مەسعود بارزانی رایدەگەیه‌نێت بۆ هەڵبژاردنی سەرۆکایەتی داهاتووی هەرێم، نە خۆی نە هیچ خزمێکی کاندید ناکات.

لەچاوپێكه‌وتنێكدا لەگەڵ رۆژنامەی عەکازی سعودی، باس له‌وه‌ده‌كات كه‌ به‌هیچ شێوه‌یه‌ك ریفراندۆم دواناخرێت و به‌داواكه‌ی وەزیری دەرەوەی ئەمریکاش رازی نه‌بووین كه‌ داوای دواخستنی ریفراندۆمی كردبوو.

بارزانی روونیشیكردووه‌ته‌وه‌ ئه‌گه‌ر ئێستا ریفراندۆم نه‌كه‌ن و گفتوگۆ له‌گه‌ڵ به‌غدا بكه‌ن و بۆ دوو ساڵیش رێکبکەون، دواتر هەر سەركه‌وتوو نابێت، چونکە هاوبه‌شیكردن له‌گه‌ڵ به‌غدا شكستی هێناوه‌.

بارزانی لەچاوپێکەوتنه‌كه‌دا وتوویه‌تی "له‌هه‌ڵبژاردنی سەرۆکایەتی هەرێمی كوردستان نە خۆم و نە هیچ خزمێکم کاندید ناکەم".
سه‌باره‌ت به‌كاریگه‌ری ئێران له‌سه‌ر عێراق، بارزانی ده‌ڵێت "ده‌مانه‌وێت پەیوەندیی هاوسەنگمان لەگەڵ ئێران هه‌بێت، نه‌ك چاودێریکردنمان".

باسی له‌وه‌شكردووه‌ ئێستا كاتێكی گونجاوه‌ بۆ ئه‌نجامدانی ریفراندۆم و وه‌كوو خەڵکی کوردستان كاته‌كه‌ی به‌ باش ده‌زانین.