ئەنجومەنی گەلی مەخمور ڕایگەیاند هێرشەکەی شەوی ڕابروو بۆ سەر کەمپی مەخمور، هێرشێکی ئاسمانیی بووە
لە ڕاگەیەنراوێکدا ئەنجومەنی گەلی مەخمور کە کەمپی مەخمور بەڕێوە دەبات ئاماژەی بۆ ئەوەکردووە "حکومەتی عێراق و ئەو هێزانەی کە دەرفەتی هێرشی ئاسمانیان هەیە، بەرپرسیارن لەو هێرشە و پێویستە حکومەتی عێراق لەمبارەیەوە روونکردنەوە بدات".
شەوی ڕابردوو هێرشێک کرایە سەر کەمپى مەخمور کە ئاوارەکانى باکورى کوردستانى تێدا نیشتەجێیە، لەئەنجامدا کەسێک شەهیدبوو و ١٢ کەسی تر برینداربوون و لە هێرشەکەدا بارەگای ئەنجومەنی گەلی مەخمور بە تەواوی خاپوور بووە.
کەمپى مەخمور لە ساڵى ١٩٩٦وە دروستکراوە و زیاتر لە ١٢ هەزار ئاوارەى باکورى کوردستانى تێدا نیشتەجێکراون، بەرپرسىارێتی ئەمنى کەمپەکەش لە ئەستۆى گەریلاکانى پەکەکەدایە.