هەرسێ لایەنی گۆڕان و کۆمەڵ و هاوپەیمانی لە راگەیەندراوی دوای سەردانەکەیان بۆ بەغدا دەڵێن " دەسەڵاتدارانی هەرێم سور بون لەسەر درێژەدان بە هەمان شێوازی کاری رابردویان".

ئەمڕۆ وەفدی هاوبەشی بزوتنەوەی گۆڕان‌و کۆمەڵی ئیسلامی کوردستان‌و هاوپەیمانی بۆ دیموکراسی‌و دادپەروەری کۆتایی بە سەردانەکەی بۆ بەغداو دیدار لەگەڵ هەر سێ سەرۆکایەتییەکەی عیراق‌و هێزو لایەنە سیاسییەکان هێنا. لە هەمو کۆبونەوەکاندا جەختمان لەسەر زەرورەتی پێدانی موچەی فەرمانبەران‌و شایستە داراییەکانی جوتیارانی هەرێم‌و ماف‌و شایستە داراییەکانی پێشمەرگەو کۆتاییهێنان بە هەلومەرجی دژواری دوزخورماتوو کەرکوک‌و سەرگەڕان‌و ناوچە جێناکۆکەکان کردەوە. هەروەها ئەنجامدانی هەڵبژاردنێکی پاك‌و بێگەرد بۆ دەستاودەسکردنی ئاشتییانەی دەسەڵات لە هەرێم‌و عیراق تەوەرێکی تری گفتوگۆکان بو، لەگەڵ پاراستنی قەوارەی دەستوریی هەرێمی کوردستان‌و مافە دەستورییەکانی.