هەسەدە ئاماری شەهید و بریندارانى شەڕەکانى عەفرینى بڵاوکردەوە و ڕایگەیاند، تا ئێستا ٤٣ شەڕڤانیان شەهیدبوون و لە بەرامبەردا ٣٠٨ چەکداری هێرشبەر لە سوپای تورکیا و گروپەکانى تر کوژراون.
هێزەکانى سوریای دیموکرات "هەسەدە" ئەمڕۆ هەینى بەیاننامەیەکى لەسەر شەڕ و پێکدادانەکانى چەند ڕۆژی ڕابردووی عەفرین بڵاوکردەوە و ڕایگەیاندووە، لە ماوەى حەوت ڕۆژى هێرشەکانى تورکیا بۆ سەر عەفرین لەسەرجەم بەرەکان زیاتر لە ٦٩٩ گولـلە هاوەن ئاراستەى هێزەکانیان کراوە و ١٩١ هێرشی ئاسمانى لە دژیان ئەنجامدراوە و ١٣٦ شەڕو پێکدادان ڕویداوە.
ئاماژە بەوەشکراوە، لە شەڕەکاندا ، ٣٠٨ چەکداری هێرشبەر لە سوپای تورکیا و گروپەکانى تر کوژراون کە دوانیان ئەفسەرى پلەبەرزبوون .
ئەوەشی تیادا هاتووە، لە ئەنجامى بۆردومانەکان تا ئێستا ٥٩ هاوڵاتی مەدەنیش شەهیدبوون و زیاتر لە ١٣٤ هاوڵاتیش برینداربوون و لە هێزەکانى هەسەدەش تا ئێستا ٤٣ شەڕڤانیان شەهیدبوون و کە ٨ شەڕڤانیان ئافرەتن.
ئەوەش هاتووە ، لە شەڕەکاندا بڕێکى زۆر چەک و تەقەمەنى دەستیبەسەردا گیراوە و ٤ ئۆتۆمبێلی سەربازی جۆری دوپشک و ٤ زرێپۆشی گوێزەرەوەى سەرباز و ٣ تانکى گەورە و هەمەرێک تێکشێندراون.
رۆژی شەممە 20ی كانوونی دووەمی 2018، سوپای توركیا بە بەكارهێنانی هێزی ئاسمانی، زەمینی لەژێر ناوی ئۆپەراسیۆنی "چلی زەیتون" هێرشی بۆ سەر شاری عەفرین لە رۆژئاوای كوردستان دەستپێكرد و ژمارەیەك هاوڵاتی و شەڕڤان شەهید و برینداربوون و ژمارەیەک سەربازی سوپای تورکیا و چەکدارانی ئۆپۆزسیۆنی سوریا کوژراون و برینداربوون.