وردبینی لە لیستی مووچەخۆرانی وەزارەتی کشتوکاڵ دەستپێدەکات و لیژنەیەکی سێ کەسی سەردانی دیوانی وەزارەت دەکەن.
خالس ئەحمەد، بەڕێوەبەری گشتیی دیوانی وەزارەتی کشتوکاڵ و سەرچاوەکانی ئاوی حکومەتی هەرێمی کودستان بە "رووداو"ی راگەیاندووە "رۆژی یەکشمەممە 4-2-2018 سێ ئەندامی لیژنەکەی بەغدا بۆ وردبینیکردن لە لیستی مووچەخۆرانی هەرێمی کوردستان سەردانی وەزارەتی کشتوکاڵ و سەرچاوەکانی ئاو دەکەن".
لەبارەی هۆکاری سەردانەکەیان خالس ئەحمەد وتی "لیژنەکە بەمەبەستی وردبینی سەردانی وەزارەت دەکات، لای خۆشمان ئامادەکاری تەواومان کردووە و سەرجەم فەرمانگەکانمان بۆ ئەو مەبەستە ئاگادارکردوونەتەوە".
لەدوای دەستپێکردنی وردبینی لە لیستی مووچەخۆرانی وەزارەتەکانی پەروەردە و تەندروستی وربینی لە لیستی مووچەخۆرانی وەزارەتی خوێندنی باڵا و توێژینەوەی زانستیش دەستیپێکردووە و بڕیارە وەزارەتەکانی دیکەشی بەدوادا بێت.