بەهۆی دەستكاریكردنی لەیبڵەكەیەوە، لیژنەكانی قائیمقامیەتی سلێمانی دەست بەسەر بڕێكی زۆر بسكیتدا دەگرن.
دیار جەمال، نوێنەری بەرێوەبەرایەتی چاودێری بازرگانی لەلیژنە هاوبەشەكانی قایمقامیەت ووتی "بەهۆی دەستكاری لەیبڵ و درێژكردنەوەی ماوەی بەسەرچوونەكەی بەدانانی دوو بەروار بەسەر روپۆشی بسكیتی (واویل) لیژنە هاوبەشەكان دەستیان بەسەر بڕی 32 كارتۆندا گرتووە".
ئەوەشی خستەڕوو "ئەو خۆراكانەی لەكارگەكان ئامادەدەكرێن و دەپێچرێنەوە، بڕێك ماددەی پاراستن لە تێكچوونیان تێدەكرێت كە مێژووی بەسەرچوونەكەی لەسەر لیبڵەكە دیاریكراوە، دوای ئەو بەروارە ماددەكە خۆی دەبێتە سەرچاوەی زیان بەخش بۆ تەندروستی مرۆڤ و بەتایبەت منداڵ".
هەروەها، بەپێی رێنماییە بازرگانیەكان، جۆری ئەو لەیبڵەی كە زانیاری كاڵاوشمەكەی تێدا تۆماركراوە پێویستە شێوەكەی لێزەری یاخو حەراری بێت و توانای دەستكاریكردن و گۆڕینی نەبێت، بۆیە ئەو كاڵاوشمەكانەی لیبڵەكانیان بەلەزگە لەسەر دانراوە دەستی بەسەردا دەگیرێت.
دیار جەمال ئاماژەی بۆ ئەوەشكرد، بەفەرمانی قائیمقامی سلێمانی و لەلایەن لیژنەی لەناوبردنەوە لەناوچەی تانجەرۆ سەرجەم ئەو بسكیتە دەست بەسەردا گیراوانە لەناودەبرێت و خاوەنەكەشی رووبەرووی یاسا دەكرێتەوە.