بەڕێوەبەرایەتی گشتیی بەنداو و كۆگاكانی ئاو لە وەزارەتی كشتوكاڵ و سەرچاوەكانی ئاو، روونكردنەوەیەکی لەبارەی گرتنەوەی ئاوی زێی بچوک لەلایەن حکومەتی ئێرانەوە بڵاوكردەوە.
دەقی روونکردنەوەکە...
بەیانی ئەمڕۆ شەممە 2/6/2018، كۆماری ئیسلامی ئێران ئاوی زێی بچووكی گرتۆتەوە و تاوەكو ئێستاش بەردەوامە و بەهۆیەوە كێشە بۆ ئاوی خواردنەوەی شاری قەڵادزێ دروستبووە و ئاوی خواردنەوە دابەش نەكراوە.
گرتنەوەی ئاوی زێی بچووك لەكاتێكدایە 1/6 كاتی بەردانەوەی ئاوە نەوەك گرتنەوەی،هەرێمی كوردستانیش لەو بەروارە ئاو بۆ خواروو و ناوەڕاستی عێراق بەردەداتەوە، بەڵام بەداخەوە كۆماری ئیسلامی ئێران لە جیاتی بەردانەوەی ئاو هەڵساوە بە گرتنەوەی و ئەمەش بۆ دووەم جارە ئاو دەگرێتەوە.
لەگەڵ دروست بوونی كێشەكە رێباز حەملان وەزیری كشتوكاڵ و سەرچاوەكانی ئاو بە وەكالەت لەگەڵ بەڕێز قوباد تاڵەبانی جێگری سەرۆك وەزیرانی حكومەتی هەرێم و بەڕێز سەركونسوڵی كۆماری ئیسلامی ئێران لە هەولێر و لایەنە پەیوەندارەكان لە پەیوەندی بەردەوامدایە بۆ چارەسەركردنی كێشەكە.
هەروەها بەڕێوەبەری گشتیی بەنداو و كۆگاكانی ئاو لە وەزارەتی كشتوكاڵ و سەرچاوەكانی ئاو لە پەیوەندیدایە لەگەڵ وەزارەتی سەرچاوەكانی ئاو لە حكومەتی عێراقی فیدرال.
بەڕێوەبەرایەتی گشتیی بەندا و كۆگاكانی ئاو لە وەزارەتی كشتوكاڵ و سەرچاوەكانی ئاو
2/6/2018