رێگای هەولێر و کەرکوک بە پردێکی ئاسنی دەکرێتەوە
وەفدی ئەمنی و هونەری هەرێم و بەغدا لە کەرکوک کۆبوونەوەو لەسەر کردنەوەی رێگای نێوان هەولێر و کەرکوک، رێککەوتن لەماوەی ٢٠ رۆژدا لە رێگای دوو پردی ئاسنینەوە هاولآتیان هاتوچۆ بکەن.
لە کۆنگرەیەکی رۆژنامەگەریدا عەبدولخالق تەلعەت بەڕێوەبەری پۆلیسی هەولێر رایگەیاند " دروستکردنی پردێک یەک ملیار دیناری تێدەچێت و ئەو پرسە جێهێڵراوە بۆ کۆبوونەوەی هەفتەیە داهاتوو".
بەڕێوەبەری پۆلیسی هەولێر وتیشی " لە ماوەی ٢٠ رۆژدا دوو پردی ئاسنینی چوون و هاتن دادەنرێت و حکومەتی هەرێم بەو کارە هەڵدەسێت".
کۆبوونەوەکە لە کەشێکی باشدا بەڕێوەچووە، وەک بەڕێوەبەری پۆلیسی هەولێر ئاماژەی بۆکرد.
هەردوولا رێککەوتن یەک شەممەی داهاتوو لەسەر پرسی دروستکردنەوەی پردی کۆنکرێتی و دانانی بازگەو سنوری هەردوولا کۆببنەوە.
لەشەڕەکانی ئۆکتۆبەری ساڵی ٢٠١٧ ی نێوان حکومەتی بەغدا و حکومەتی هەرێم، هێزی پێشمەرگە بۆ بەرگرتن لە هێزەکانی عێراق ئەو پردەیان تەقاندەوەو ، رێگاکانیش گیران و هاولآتیان دووچاری کێشەی گەورەبوونەتەوە.
PM:06:02:24/07/2018