وەزیری دارایی هەرێم بەمەبەستی بەگەڕخستنەوەی پڕۆژە خزمەتگوزارییەكان و دروستکردنی چەند یەکەیەکی نیشتەجێبوون، تەرخانکردنی بڕێک پارەی بۆ پرۆژەکانی سنوری پارێزگای سلێمانی راگەیاند.
ئەمڕۆ دووشەممە 6ی ئاب رێباز حەملان، وەزیری دارایی و ئابووری هەرێمی كوردستان لەگەڵ د. هەڤاڵ ئەبوبەكر، پارێزگاری سلێمانی کۆبووەوەو ،لە کۆبونەوەکەدا باسیان لەكێشە و گرفتەکانی هاوڵاتیانی سنوری پارێزگای سلێمانی كرد.
لە كۆبوونەوەكەدا رێباز حەملان، وەزیری دارایی و ئابووری هەرێم ئاماژەی بەوەکرد، "لەسەر راسپاردەی نێچیرڤان بارزانی، سەرۆكی ئەنجوومەنی وەزیران و بۆ خزمەتكردنی زیاتری خەڵكی پارێزگای سلێمانی پارەی پێویست تەرخانكراوە بۆ پڕۆژەكانی نیشتەجێبوونی (زڕگوێز و سیتەك)، كە پێکدێت لە دوو هەزار و پێنج سەد یەكەی نیشتەجێبوون بۆ هاوڵاتیانی كەمدەرامەت".
وتیشی، "بڕێك پارەش بۆ دابینكردنی پێداویستی فەرمانگەكانی پارێزگای سلێمانی تەرخانكراوە ، ئەوەش بەمەبەستی راییكردنی ئیش و كاری فەرمانگاكان و هاوڵاتیان".
وەزیری دارایی هەرێم لە کۆبونەوەکە باسی لەوەشكرد،"بڕی زیاتر لە دوو ملیار دینار بۆ بەڕێوەبەرایەتی گشتی كارەبای سلێمانی تەرخانكراوە ، ئەوەش بۆ كڕینی محاویلە و هێڵەكانی كارەبا بۆ چارەسەركردنی كێشەی كارەبا لە سنوری پارێزگاكە".
هەروەها وەزیری دارایی و ئابووری دوپاتیشیکردەوە، "سەرەڕای دابەشكردنی مووچە لەكاتی خۆیدا لە ئێستادا حكومەتی هەرێم لە هەوڵی تەواودایە بۆ بەگەڕخستنەوەی پڕۆژە خزمەتگوزاریەكان لە پێناوخزمەتكردنی خەڵكی كوردستان".