ئەندامێکی ئەنجومەنی پارێزگای سلێمانی رایگەیاند " بەشە نەوتی پارێزگای سلێمانی بۆ 3 هێندە زیادکرا و پڕۆسەی دابەشکردنی نەوتیش خێراتر بەڕێوەدەچێت" .
رێکەوت زەکی، ئەندامێکی ئەنجومەنی پارێزگای سلێمانی لەسەر فراکسیۆنی یەکێتی بە سپی راگەیاند " بەشە نەوتی پارێزگای سلێمانی بۆ 3 هێندە زیادکراوە و بەمەش پڕۆسەی دابەشکردنی نەوت خێراتر بەڕێوەدەچێت".
ناوبراو وتیشی "بەشە نەوتی پارێزگای سلێمانی لە 180 هەزار لیتر بۆ 540 هەزار لیتری رۆژانە زیادکراوە و ئەمەش دەبێتە هۆی خێراترکردنی پڕۆسەی دابەشکردنی نەوت لە پارێزگاکە و دەتوانرێت تا سەرەتای مانگی 12 پرۆسەی دابەشکردنی نەوت بەسەر سەرجەم 10 مەڵبەندەکەی پارێزگای سلێمانی و قەزای شارباژێر دابەشبکرێت".
ئەندامەکەی ئەنجومەنی پارێزگا راشیگەیاند" دوای تەواوبوونی پرۆسەی دابەشکردنی نەوت دووبارە پرۆسەکە لە مەڵبەندی 1ی سلێمانیەوە دەستپێدەکاتەوە و لە شار و شارۆچکەکانی تریشدا بەردەوام دەبێت."
بەهۆی کەمی بڕی نەوتی سپی نێردراوە بۆ پارێزگای سلێمانی لەم ماوەیەی رابردوودا نەوتی ساڵی پار بەسەر ناوەندی پارێزگادا دابەشکرا، بەڵام ئەم زیادبوونە پرۆسەی دابەشکردن خێرا دەکات.