فازڵ میرانی، سكرتێری مەكتەبی سیاسیی پارتی دیموكراتی كوردستان رایگەیاند، لە كابینەی نوێی حكومەتدا دوو جێگر بۆ سەرۆكی هەرێمی كوردستان دانانرێت.
فازڵ میرانی بە میدیای حزبەكەی راگەیاند، پێدەچێت جێگر و یاریدەدەرێك بۆ سەرۆكی هەرێم دابنرێت و دوو جێگری نابێت و دەڵێت "ئەوەی گرنگە رێككەوتنی پارتی و یەكێتییە بۆ پێكهێنانی كابینەی نوێی حكومەتی هەرێم و لای ئەوان پۆست گرنگ نییە".
ئەم لێدوانەی فازڵ میرانی دوای بڵاوبوونەوەی ئەو دەنگۆیانە هات كە جێگرێكی دیكە بۆ سەرۆكی هەرێم دادەنرێت و ئەو پۆستەش بە یەكێتی نیشتمانی دەدرێت.
هەفتەی رابردوو دوای ١٣ كۆبوونەوە لەسەر پێكهێنانی كابینەی نوێی حكومەتی هەرێم، بەرپرسانی یەكێتی و پارتی رێككەوتنی نێوانیان راگەیاند و بڕیاریشە لە رۆژانی داهاتوودا رێككەوتنەكەیان واژۆ بكەن.