لە ئێران وەزارەتی تەندروستی ئەو وڵاتە بەهۆی زۆربونی ژمارەی توشبون و مردن بەکۆرۆنا وهاتنی شەپۆلێکی نوێی کۆرۆنا باری نائاسایی تەندروستی لەتەواوی ناوچەکانی وڵاتەکەی راگەیاند.
وەزارەتی تەندروستی ئێران لە راگەیەنراوێکدا ئاماژە بۆ ئەوە دەکات کە هیچ نەشتەرگەرییەکی دیکە رێگەی پێنادرێت و تەواوی توانا تەندروستییەکان بۆ روبەروبونەوەی کۆرۆنا تەرخاندەکرێت.
وەک وەزارەتەکە دەیخاتەڕوو، بڕیارەکە سبەی شەممە لەلایەن ئەنجومەنی نیشتیمانی روبەڕوبونەوەی کۆرۆنا جێبەجێدەکرێت و بەکارهێنانی دامامک لەتەواوی شوێنە تایبەت و گشتییەکان دەکرێتە ناچاری.
بۆ جێبەجێکردنی ئەم بڕیارە، هێزەکانی باسج دەمامک بەبێ بەرامبەر بەسەر هاوڵاتیاندا دابەشدەکەن. هەروەها پارێزگای تاران قەدەغەکردنی هاتوچۆی لەهەندێک ناوچە راگەیاندوە.
ئەوە لە کاتێکدایە، هەینی ٤ هەزار و ١٤٢ حاڵەتی نوێی توشبون بەکۆرۆنا راگەیەندراوە و بەوەش کۆی ژمارەی توشبوان بۆ ٤٩٢ هەزار و ٣٧٨ حاڵەت بەرزبوەوە، هاوکات ٢١٠ حاڵەتی نوێی مردن بە کۆرۆنا تۆمارکرا و بەوەش کۆی ژمارەی مردوان بۆ ٢٨ هەزار و ٩٨ حاڵەت بەرزبوەوە.