بەرپرسی كۆمەڵەی پێشمەرگە دێرینەكان لە دوای کۆبوونەوەیەکیان لەگەڵ سەرۆکی پەرلەمان و لیژنەی پێشمەرگە رایگەیاند" بەشێک لە پێشمەرگە و سەرکردەکانی رابردوو گەندەڵن و دەستیان لەم دۆخەدا هەیە، "ئێمە بە شێوەیەکی سوک سەیری دەکەین و لەسەر ئێمەی حساب مەکەن".
لە کۆنگرەیەکی رۆژنامەگەریدا دوای کۆبوونەوەی کۆمەڵەی پێشمەرگە دێرینەکان و لەگەڵ سەرۆکی پەرلەمان و لیژنەی پێشمەرگە لە پەرلەمانی کوردستان جەمیل هەورامی رایگەیاند" ئەمڕۆ هاتووین لەگەڵ سەرۆکی پەرلەمان و ئەندامانی لیژنەی پێشمەرگە لە پەرلەمان بەدواداچوون بۆ پرۆژە یاسای رێزلێنانی پێشمەرگە دێرینەکان بکەین ".
ئەو وتیشی " بەهۆی قەیرانی دارایی حکومەتەوە چاوەڕێیان کردووە و ئارامیان گرتووە".
جەمیل هەورامی نەیشاردەوە کە بەشێک لە پێشمەرگە و سەرکردەکانی رابردوو " گەندەڵن و دەستیان لەم دۆخەدا هەیە"، وتیشی "ئێمە بە شێوەیەکی سوک سەیریان دەکەین و لەسەر ئێمەی حساب مەکەن".
هەورامی بەتوندی دژی سووکایەتیکردن بە پێشمەرگە دێرینەکان وەستایەوەو ئاشکراشی کرد کە سەرقاڵی دانانی رادیۆیەکن و لە ئایندەشدا کار بە دامەزراندنی تەلەفزیۆنێک دەکەن.
هەر لەو کۆنگرە رۆژنامەگەریەدا، عوسمان سێدەری جێگری سەرۆكی لیژنەی كاروباری پێشمەرگە لە پەرلەمانی كوردستان، رایگەیاند " دەبوایە یەکەمین یاسا لە پەرلەمانەدا کە دەرچوێنراوە، یاسای ماف و ئیمتیازاتی شەهیدان و پێشمەرگە دێرینیەکان بووایە".
لە درێژەی قسەکانیدا وتیشی " هەوڵدەدەن لە ماوەیەکی دیاریکراودا پشتیوانی لایەنە سیاسییەکان بەدەستبهێنن تا بتوانن پرۆژەیاساکەیان بچێتە بواری جێبەجێکردنەوە."