هەر ئەوەندە تەماشایەكی ئاوارە عەرەبەكەی كرد، كە ریزی بۆ وەرگرتنی نەوتەكەی عەبادی گرتبوو، بە چاوێكی گریاناوی و بە دڵێكی پر لە خەم و تەنگەنەفەسیەوە، گوتی كاكە ئەمە نەوتەكەی عەبادیە بۆ ئەمانە هاتووە؟ وتم بەڵێ .  كەوتە دەربرینی حاڵی دڵی خۆی و وتی : دەشێت منێك ئەمە حاڵم بێت و لیترێك نەوتم لەماڵە پێنج كەسیەكەمدا نەبێت و ئەم وەزعە وا ببینم و...... دای لە پڵمەی گریان و قسەكانی پێ تەواو نەكرا و بۆ ماوەیەك بە بێ دەنگی وەستا و لە جێی خۆی بێ جوڵە و نوتق بە تێرامانەوە تەماشای پرۆسەی دابەشكردنی نەوتەكەی عەبادی بەسەر ئاوارەكاندا كرد، كە لە ناو شارێكی گەورەی ئەم كوردستانەی ژَێر زەوی پر لە نەوت و كانزایەدا ئەمە حاڵی بێت . ئەوەی بینیم هەر ئەوەندە مابوو بچم بەناخی زەویدا و ئاواتەخوازبووم كە پێش مردنم ئەو دیمەنەم لە ژیانمدا نەبینیبا . ئینجا وتی:  كوری خۆم دەشێت ئەمانە حكومەتەكەیان لەبەغداوە نەوتیان بۆ بنێریت و حەقی خۆیانە و ئەو دڵسۆزیەی دەسەڵاتدارانیان پیرۆزیان بێت، بەڵام دەكرێت منێك لەسەر زەوی و ماڵی خۆم بەبژی و مەمرە بژیم و خاوەن قوربانی و بێ وڵات و بێ حكومەتی دڵسۆز بم، چی بكەم، بۆ وەزعمان بەیەكلادا ناخەن و خەریكی ملشكاندنی یەكترن .
ئینجا وتی ئەم سەرمایە رەحم بەكەس ناكات و چاوەرێی من ناكات كە كەی هەمبێت برێك نەوت بكرم . وتی بەسەری تۆ لە سەرمادا بمرم دەمم بۆ دەستی ئەمانە نابەم، هەرچەند دراوسێیەكی عەرەبمان هەیە زۆر جار دەڵێت ئەگەر نەوتت پێویستە بەشت دەدەم .
وتم مامە كَیان حەق وایە ئەم بەناو دەسەڵات و حكومەتەی ئەم حاڵەتەی دروستكردووە لەدەرئەنجامی نەزانین و بە هۆكاری دزی و گەندەڵی و ململانێی حزبی و شەخسی و بەدەنگی بەرز شكستهێنانی خۆی رابگەیەنەێت و، لەم كاتەدا نەك وازی لەم دەسەڵاتداریە بهێنابایە، بەڵكو دەبوو سەرە زەبەلاحەكانی دەسەڵاتەكەمان بەم وەزعەی تۆ خۆیان لەناوبردبایە و ئەم میلەتەیان نەگەیاندبایە ئا ئەم وەزعە .  ئالەم دیمەنەوە وەزعی حكومەت و چۆنێتی بەرێوەچونی كاروباری دەسەڵات شیبكەنەوە و هەڵسەنگاندن بۆ هەست و شعور و میلەتدۆستیی بەرپرسەكانی ئەم گەلە خێر لەخۆنەدیوە بكەن .