وتەبێژی یەکێتی نیشتمانی کوردستان وەڵامی راگەیاندنەکەی پارتیدا دەداتەوەو دەڵێن" وەفدەكانی پارتی بوون بە ناوەڕۆكێكی تەمومژاویەوە دەهاتن بۆ كۆبوونەوەكان"، هاوکات داوای رێککەوتنێکی کۆنکرێتی لەگەڵ پارتی دەکات.
ئەمین بابە شێخ وتەبێژی یەكێتیی نیشتمانی كوردستان لە وەڵامی راگەیاندراوەكەی ئەمرۆی وتەبێژی پارتی دیموكراتی كوردستان دەڵێت " یەكێتیی نیشتمانیی كوردستان هەمیشە لەگەڵ یەكڕیزی ماڵی كورد بووەو هەوڵی بەردەواممان دوپاتكردووەتەوە، بەڵام كە دڵنیابووین پارتی بەئەجێندایەكی تەمومژاوی هاتە ناو دانوستانەكان و نێو پرۆسەی سیاسی عیراقەوە هەستمان كرد ئەو هەوڵانە مەترسیدار دەبن و خزمەت بەپرۆسەی دیموكراسی و مافە دەستووریەكانی گەلانی عیراق و قەوارەی هەرێم ناكات، بۆیە ئێمەش لەڕوانگەی بڕوای نەگۆڕو چەسپاومان بەڕێكارە دەستووری و دیموكراتییەكان لەپرۆسەی سیاسی عیراق كاندیدی پەسەندكراوی خۆمان و بەڕەزامەندی زۆر لایەنی تری عیراقی و كوردستانی بۆ پۆستی سەرۆك كۆماری عێراق دیاریكرد".
لێدوانەی بۆ راگەیاندنەكاندا:
كۆبوونەوەی ئەنجومەنی سەركردایەتی یەكێتی نیشتمانیی كوردستان كە دوێنێ ٢٣ ی كانونی دووەمی ٢٠٢٢، بۆ رای گشتی كوردستانیی بڵاویكردەوە، خستنەڕووی راستییەكانی تێدابوو ،چونكە لەدانوستاندنەكاندا هەر لەدوای راگەیاندنی ئەنجامەكانی هەڵبژاردنی تشرینی یەكەمی ساڵی پارەوە هەوڵەكانمان بۆ ئەوە بوو بەیەكڕیزی و پڕۆژەیەكی یەكگرتوی نیشتمانییەوە لەگەڵ لایەنە سیاسیەكانی عیراق بە شیعە و سوننەوە بچینە بەغدا، بەڵام بەداخەوە پێشبینی ئەوە دەكرا پێشوەخت پارتی لەگەڵ چەند لایەنێكی تردا بەبێ ئاگاداری ئێمەو لایەنەكانی تر چوبوونە ناو رێككەوتنێكەوە كە بەهیچ شێوەیەك خزمەت بە پرۆسەی سیاسی لەعیراق و مافەدەستوریەكان و قەوارەی هەرێمی كوردستان ناكات.
هەر لەسەرەتای ئەو كۆبوونەوانەوە ھەڤاڵ بافل جەلال تاڵەبانی و وەفدەكانی یەكێتیی نیشتمانیی كوردستان بە دەسەلاتی تەواو و بەبڕیاری سەربەخۆی نیشتمانیەوە لەگەڵ پارتیدا گفتوگۆیان دەكرد دوور لەپرەنسیپەكانی تاكڕەوی و قۆرخكاری له پرۆسەی بڕیاردانی سیاسیدا. بەڵام بەداخەوە ئەوە وەفدەكانی پارتی بوون كە بەناوەڕۆكێكی تەمومژاویەوە دەهاتن بۆ كۆبوونەوەكان.
هەر لێرەدا بەبیر پارتی دیموكراتی كوردستان دەهێنینەوە كە هیچ رێككەوتنێكی كۆنكرێتیمان لەگەڵیان نەبووە، چونكە خۆیان هەلی وایان نەڕەخساندو دەیانوویست رێككەوتنێكی ناشەفافمان لەگەڵ بكەن.
بەشداری نەكردنی فراكسیۆنی یەكێتی لەیەكەم دانیشتنی عیراق لەبەر هەڵوێستی پارێزگاری كەركوك بەوەكالەت (راكان جبوری) و كێشەی كەركوك و ناوچە دابڕێنراوەكان بوو و ھیچ پەیوەندی بەهەڵبژاردنی دەستەی سەرۆكایەتی پەرلەمانەوە نەبووە.
لەبارەی دووبارە كاندیدكرنەوە ی سەرۆك بەرهەم ساڵح بۆ خولی دووەمی سەرۆكایەتی، پێداگریمان بۆ ئەوەیە كە ئەو وەك پارێزەری دەستووری عیراقی فیدراڵ و پارێزەری بەرژەوەندییەكانی گەلانی عیراق و قەوارەی هەرێمی كوردستان دەبێت، وەك چۆن هەمیشە نوێنەرانی تری یەكێتی نیشتمانی لەبەغدا بەپێی دەستوور ئەم ئەركەیان جێبەجێكردووە.
یەكێتیی نیشتمانیی كوردستان هەمیشە لەگەڵ یەكڕیزی ماڵی كورد بووەو هەوڵی بەردەواممان دوپاتكردووەتەوە، بەڵام كە دڵنیابووین پارتی بەئەجێندایەكی تەمومژاوی هاتە ناو دانوستانەكان و نێو پرۆسەی سیاسی عیراقەوە هەستمان كرد ئەو هەوڵانە مەترسیدار دەبن و خزمەت بەپرۆسەی دیموكراسی و مافە دەستووریەكانی گەلانی عیراق و قەوارەی هەرێم ناكات، بۆیە ئێمەش لەڕوانگەی بڕوای نەگۆڕو چەسپاومان بەڕێكارە دەستووری و دیموكراتییەكان لەپرۆسەی سیاسی عیراق كاندیدی پەسەندكراوی خۆمان و بەڕەزامەندی زۆر لایەنی تری عیراقی و كوردستانی بۆ پۆستی سەرۆك كۆماری عێراق دیاریكرد.
لە كۆتاییدا دوپاتی دەكەینەوە كە یەكێتیی نیشتمانیی كوردستان بۆ چارەسەركردنی كێشەكان هەمیشە بڕوای بەپرەنسیبی دیالۆگ و دانوستاندن نەگۆڕەو ئێستاش لە پێناوی بەرژەوەندی گشتی دەرگای ئەو بژاردەیەمان دانەخستووە بەمەرجێ بۆ رێككەوتنێكی كۆنكریتی بێت.