بەرەبەیانی ئەمڕۆ هەینی بوومەلەرزەیەکی دیکەی بەهێز لە پارێزگای مەڕەشی باکووری کوردستان ڕوویدا.
دەستەی کارەسات و فریاگوزاری تورکیا - ئافاد لە بەیاننامەیەکدا ڕایگەیاند" کاتژمێر (٥:٥٣) خولەکی بەیانی ئەمڕۆ بومەلەرزەیەک بە گوڕی (٥) پلەی ڕێختەر پارێزگای مەرەشی باکووری کوردستانی هەژاندوو".
دەستەی کارەسات و فریاگوزاری تورکیا لە ڕاگەیەندراوەکەدا ئاماژەی بەوەشکردووە، گوندی (دۆنگەل)ی سەر بە شارۆچکەی (دوانزەی شوبات) چەقی بوومەلەرزەکە بووە کە بە قووڵای (٦.٩٥) کیلۆمەتر تۆمارکراوە.
بەپێی ئامارێکی دەستەی بەڕێوەبردنی کارەسات و فریاکەوتنی تورکیا، کۆی ژمارەی ئەو کەسانەی بەهۆی بوومەلەرزەکەی ڕۆژی ٦ی ئەم مانگە گیانیان لەدەستداوە بۆ ٤٥ هەزار کەس بەرزبووەتەوە، لەکاتێکدا ژمارەی بریندارەکان زیاتر لە ١١٥ هەزار کەسی تێپەڕاندووە.