وڵاتی سعودیە بڕیاریداوە بۆ دیاریكردنی یەكەم رۆژی جەژنی قوربان، موسڵمانانی ولاتەكەی چاودێری بینینی مانگ بكەن.
بەپێی راگەیەندراوێك كە لەلایەن دادگای باڵای سعودیەوە بڵاوكرایەوە "رۆژی یەكشەممە 1/11/1444 كە دەكاتە 21/5/2023 زاینی، یەكەم مانگی (زولقەعدە) بوو، بۆ ئەمساڵیش لەسەر بنەمای بڕیاری دادگای باڵا دەبێت، بۆیە داوا لە موسڵمانان دەكرێت، لە ئێوارەی سبەینێ یەكشەممە 29/11/1444 كە دەكاتە 18/6/2023، چاودێری بینینی مانگی (زولحەجە) بكەن".
راگەیەنراوەكە ئاماژەی بەوەكردووە "ئەگەر موسڵمانان مانگیان بە چاو بینی یاخود بە تیلسكۆب، ئەوا نزیكترین دادگا ئاگادار بكەنەوە و شایەتی خۆیان پێشكەش بكەن، یان پەیوەندی بە نزیكترین ناوەندەوە بكەن".
پێشتر وڵاتی سعودیە رایگەیاند، رۆژی چوارشەممە 28-6-2023 یەكەم رۆژی جەژنی قوربانە، بەو پێیەی وڵاتی سعودیە بە دایكی مەزهەبی سوننەكانی جیهان دادەنرێت، بۆیە هەر بڕیارێكی لەو وڵاتە سەبارەت بە جەژن دەربچێت، وڵاتانی دیكەی سوننە پابەند دەبن پێوەی.