بڕیارە پێشنیوەڕۆی ئەمڕۆ سێشەممە ٢٠ی شوباتی ٢٠٢٤ سەرۆکایەتی هەرێم لەگەڵ کۆمسیۆنی باڵای سەربەخۆی هەڵبژاردنەکانی عێراق و یۆنامی، پرسی هەڵبژاردنی خولی شەشەمی پەرلەمانی کوردستان تاوتوێ بکات.
دڵشاد شەهاب وتەبێژی سەرۆکایەتی هەرێم، بەیانی ئەمڕۆ لە لێدوانێکدا بە میدیاکانی ڕاگەیاندووە" پێشنیوەڕۆی ئەمڕۆ سەرۆکایەتی هەرێم لەگەڵ شاندێکی یونامی و کۆمیسیۆنی باڵای سەربەخۆی هەڵبژاردنی عێراق کۆدەبێتەوە".
ئاماژەی بەوەشکرد، لە کۆبوونەوەکەدا پرسی هەڵبژاردنی داهاتووی پەرلەمانی کوردستان تاوتوێ دەکرێت و وادەیەکی دیکە بۆ بەڕێوەچوونی خولی شەشەمی هەڵبژاردنی پەرلەمان دیاریدەکرێت.
لە ماوەکانی ڕابردووشدا سەرۆکایەتی هەرێم لەگەڵ کۆمسیۆنی عێراق و یۆنامی کۆبوونەتەوە و وادەیەک بۆ هەڵبژاردنی هەرێم دیاریکراوە، بەڵام تائێستا هەڵبژاردن بەڕێوەنەچووە.
هەروەها هەڵبژاردنی داهاتووی هەرێم لە لایەن کۆمیسیۆنی باڵای سەربەخۆی هەڵبژاردنەکانی عێراقەوە سەرپەرشتی دەکرێت و بڕیاریشە سبەینێ چوارشەممە دادگای فیدراڵی عێراق بۆ بڕیاردان لەسەر سکاڵایەکی تایبەت بە ھەمواری یاسای ھەڵبژاردنی پەرلەمانی کوردستان کۆبێتەوە و بڕیاری کۆتایی لەبارەی ئەو داوایە بدات.