وەزارەتی نەوتی عێراق لیژنەیەکی بۆ کۆتاییهێنان بە کێشەو گرفتەکانی نەوتی هەرێم پێکهێناو هەوڵدەدرێت بە زوویی بەڕێگەی یاسایی و دەستوری کێشەکان چارەسەر بکرێن.
عاسم جیهاد، وتەبێژی وەزارەتی نەوتی عێراق ڕایگەیاند" کاری لەپێشینەی حکومەت چارەسەرکردنی کێشەی نەوتی هەرێمە بەڕێگەی یاسایی و دەستووری و هەوڵەکان بۆ چارەسەرکردنی کێشەکان چڕ کراونەتەوە".
وتیشی" لیژنەی هونەری و یاسایی لە نوێنەرانی وەزارەتی نەوتی عێراق و هەرێم پێکهێنراوە بۆ یەکلاییکردنەوەی پرسی نەوتی هەرێمی کوردستان ، و سودانی وەزارەتی نەوتی راسپاردووە لیژنەیەکی تایبەتمەند سەردانی هەرێمی کوردستان بکەن بۆ چارەسەرکردنی کێشە هەڵپەسێردراوەکان".
وتەبێژی وەزارەتی نەوتی عێراق ئاماژەی بەوەشداوە، بەهۆی کەڵەکبوونی هەڵە و کەموکوڕییەکانی پێشوو لە کەرتی نەوت لە نێوان هەردوو حکومەتدا، رادەستکردنی نەوتی هەرێم بە ناوەند ئاڵۆز بووە و ئەنجومەنی وەزیران لەڕێگەی ئەو لیژنەیەوە دەیەوێت کارەکانی ڕادەستکردن و کیشەکان چارەسەر بکات و بە زووی بگەینە ڕێککەوتنێکی هاوبەش لە نێوان هەردوولا.
ساڵانێکە کێشەی نەوت لە نێوان هەرێم و بەغدا ڕوو لە ئاڵۆزییە، بەتایبەت دوای ڕاگرتنی هەناردەی نەوتی هەرێم لە ڕێگەی بەندەری جەیهانەوە بە بڕیاری دادگای پاریس، وا زیاتر لە ساڵێکە نەوتی هەرێم ڕاگیراوە و عێراقیش کێشەی لەگەڵ تێچووی دەرهێنان و گواستنەوە و کرێی کۆمپانیاکانی نەوت هەیە لە هەرێم، و ئامادەنییە ئەو بڕەپارەیە بداتە کۆمپانیاکان کە جیاوازییەکەی لەگەڵ کۆمپانیای سۆمۆ چەند قاتە، بۆئەمەش لەماوەی ئەمساڵەدا زیانی ملیاران دۆلار بەر کەرتی نەوت لە هەرێم و عێراق کەوتووە، و ئاسۆی چارەسەرکردنی کێشەکانش بە نادیاری ماوەتەوە.