سەرۆکایەتى بەرەى تورکمانى عێراق، ئێوارەی ئەمڕۆ یەکشەممە له‌باره‌ی ڕووداوەکەی کفری ڕاگەیەندراوێکی بڵاوکردەوە و دەڵێت" ئه‌و هێرشه‌ تیرۆریستییه‌ بە درۆنکراوە و میوانخانەیەکى هۆزى بەیاتى لە قەزاى کفرى کردوەتە ئامانج و بە هۆیەوە حوسێن عەلوش کوژراوە". 

 

ئەوەش هاتووە" ئەو ھێرشە بەڵگەى بەئامانجگرتنى راستەوخۆى پێکھاتەى تورکمانە و ئاماژەیەکى مەترسیدارە کە ئامانج لێى تێکدانى دۆخى ئەمنى و سەقامگیرى و پێکەوەژیانە لە نێوان پێکهاتەکانى کفرى، بەتایبەت لەگەڵ نزیکبونەوەى هەڵبژاردنى پەرلەمانى کوردستان".  

 

هەروەها به‌ره‌ی‌ توركمانی‌ داوا له‌ فه‌رمانده‌ی‌ گشتی‌ هێزه‌ چه‌كداره‌كانی‌ عێراق و سه‌رۆك وه‌زیران و حكومه‌تی‌ هه‌رێم ده‌كات كه‌" رێوشوێنی خێرا بگرنه‌به‌ر به‌ ئامانجی‌ سه‌پاندنی ئاسایش له‌ قه‌زای‌ كفری و له‌ناوبردنی‌ رێكخراوه‌ تیرۆریستییه‌كان و پاراستنی‌ هاوڵاتیانی‌ مه‌ده‌نی‌ و  لێكۆڵینه‌وه‌ی به‌په‌له‌ بۆ ئاشكراكردنی ورده‌كاری‌ رووداوه‌كه‌ و ئه‌وانه‌ی له‌ پشتیه‌وه‌ن و تاوانباران راده‌ستی دادگا بكرێن تا به‌ سزای‌ دادوه‌رانه‌ بگه‌ن".

دواینیوەڕۆی ئەمڕۆ لە كفری‌ ته‌قینه‌وه‌یه‌ك روویدا و به‌هۆیه‌وه‌ حسێن عه‌لوش كه‌سایه‌تی‌ هۆزی‌ به‌یاتی‌ توركمانی‌ گیانی‌ له‌ده‌ستدا.