سەرۆكی هەرێمی كوردستان و باڵیۆزی فەڕەنسا لە عێراق كۆبوونەوە و جەخت لە ئەنجامدانی هەڵبژاردنی پەرلەمانی كوردستان لەوادەی دیاری كراوی خۆیدا دەكەنەوە، كە مانگی حوزەیرانی ئەمساڵە.
سەرۆکایەتیی هەرێمی کوردستان لە ڕاگەیەنراوێکدا ئاماژەی بەوەكردووە، نیوه‌ڕۆی ئه‌مڕۆ سێ شه‌ممه، نێچیرڤان بارزانی، سه‌رۆكی( ماوە بۆ درێژکراوەی) هه‌رێمی كوردستان له‌گه‌ڵ پاتریك دورێل، باڵیۆزی فه‌ره‌نسا له عێراق كۆبووه‌وه و لەبارەی دۆخی ناوخۆی هه‌رێمی كوردستان، په‌یوه‌ندییه‌كانی فه‌ره‌نسا له‌گه‌ڵ عێراق و هه‌رێمی كوردستان و په‌یوه‌ندییه‌كانی هه‌ولێر ـ به‌غدا، گفتوگۆیان كرد.
بەپێیی ڕاگەیەنراوەكە، له ته‌وه‌رێكی دیكه‌ی كۆبوونه‌وه‌كه‌دا " جه‌ختیان له گرنگیی ئه‌نجامدانی هه‌ڵبژاردنی په‌رله‌مانی كوردستان به به‌شداریی هه‌موو لایه‌نه‌كان كرده‌وه، هه‌روه‌ها به‌ره‌وپێشچوونه‌كانی گفتوگۆی حكومه‌تی هه‌رێمی كوردستان و حكومه‌تی عێراقیی فیدڕاڵییان به ئه‌رێنی هه‌ڵسه‌نگاند".
دۆخی ناوچه‌كه به‌گشتی و چه‌ند پرسێكی دیكه‌ی جێی بایه‌خی هاوبه‌ش، لایه‌نێكی دیكه‌ی كۆبوونه‌وه‌كه بوو.
ڕۆژی ٣ـی ئازاری ٢٠٢٤، نێچیرڤان بارزانی، سەرۆکی هەرێمی کوردستان، ڕۆژی ١٠ی حوزەیرانی ئەم ساڵی بۆ بەڕێوەچوونی هەڵبژاردنی پەرلەمانی کوردستان دیاریکرد.
بەڵام ١٨ی ئازار، پارتی دیموکراتی کوردستان بڕیاریدا بەشداری هەڵبژاردن نەكات و لە بەیاننامەیەكدا ڕایگەیاند" لە سۆنگەی تێگەیشتنمان لە پێگە و بەرپرسیاریێتیی مێژوویی، لە بەرژەوەندیی گەل و نیشتمانەکەمانی دەزانین، کە بەشداریی هەڵبژاردنێکی بەنایاسایی و نادەستووری و لە سایەی سیستمێکی سەپێندراودا بەڕێوەبچێت، نەکەین".