نەوشیروان مستەفا  ساڵی 1960 شیعرێكی بەناوی (زەلزەلەی رق‌و قینی هەژاران) هۆنیوەتەوە كە لەو ساڵەدا لە گۆڤاری روناهی بڵاوکرایەوە.

دەقی شیعرەكە بخوێنەرەوە:

زەلزەلەی رق و قینی هەژاران‌‌
کۆشکی چینی زۆرداران‌‌
دێنێتە جوڵە و لەرزین و هەژان‌‌
خاپوری ئەکا رۆژێک لەڕۆژان

ئەو کۆشکە بەرزەی... چینی خوێنمژی‌‌
گرتوەتە باوەش... لەناویا ئەژی‌‌
لەسەر حسابی ماندووبوونی گەل‌‌
ئەلەرێتەوە، ئەهاوێژن پەل‌‌
تیا رائەبوێرن، ئەخۆن و ئەژین‌‌
بەگاڵتەوگەپ و سەما و پێکەنین‌‌
تکەی عارەقی چینی کارکەران‌‌
دڵۆپی هێزی بازووی رەنجدەران...‌‌
ئەکەن بە پارە و دینار و تمەن‌‌
ئەینێنە قاسە و کەڵەکەی ئەکەن

ئەو کۆشکەی کەوا... نەخش و نیگاری‌‌
بۆیەی پەنجەرە و دەرگا و دیواری‌‌
دڵۆپەی خوێنی گەشی رژاوی‌‌
دڵ و رومەت و مێشکی برژاوی‌‌
جەنگاوەرانی دەستەی هەژارە‌‌
کە زۆربەی گەلی برسی و زامدارە

ئەو کۆشکە بەرزەی کە پایەکانی‌‌
کەلـلە و جومجومە و لاشە و ئێسقانی‌‌
زۆربەی میلـلەتی چەوساوە و لاتە‌‌
(کە قاڵبووی بۆتەی هەوڵ و خەباتە)‌‌
یەکسەر ئەڕوخێ و هەرەس ئەهێنێ‌‌
خوێنمژان ئەمرن، ناویان نامێنێ‌‌
ئەوساکە میلـلەت بە ئارەزووی خۆی‌‌
لەسەر کەلاوەی ئەو دەورەی کە رۆی‌‌
کۆشکی رژێمێک دائەمەزرێنێ‌‌
هەتا هەتایە ناوی بمێنێ

دوور لە تاریکی و سزا و ئازاردان‌‌
رووناک بە تیشکی رۆژی هەوڵدان
بۆنخۆش بە بۆنی گوڵی یەکسانی
فێنک بە شنەی بای کامەرانی.