پەرلەمانتارێکی گۆڕان جەخت لەسەر ئەوە دەکاتەوە کە پێشخستنی کوڕەکانی " کاک نەوشیروان" لەگەڵ فیکرو پرەنسیپی ئەواندا نایەتەوەو، ئەو " پڕوپاگەندانە" بە شکاندانی شکۆی ئەوا دەزانێت و دەشڵێت" هەمووشتێکیان بەرامبەرمان کردووە تەنها تیرۆری جەستەیی نەبێت".
لە روونکردنەوەیەکدا هۆشیار عەبدوڵا رەخنە لە هاورێکانی لە گۆڕان و پرۆپارتییەکان و ئەو رێبازە ئۆردوغانییە دەگرێت کە هەرێم بەرەو ریفراندۆم دەبات و دەڵێت" لە ساتەوەختێکی وەک بەزمی ڕیفراندۆما ئەبو غەمی هەمو دڵسۆزیک بۆ فکری گۆڕانخوازی چۆنێتی پاراستنی هەرێمەکەمان بوایە لە ئەجێندا شەخسی وحزبیەکانی پشت ئەو ڕیفراندۆمە ، لە وەها ساتێکدا گروپێک نابەرپرس هاتون ترسنۆکانە و لە پاشەملە و بە دیعایە ، تەپوتۆزێکیان لەسەر ئێمە دروستکردوە و تۆمەتبار دەکرێین بە تەکەتولبازیی، بە پاڵپشتیی لە هێنانەپێشەوەی کوڕی کاک نەوشیروان،هەروەها بە بنەماڵییکردنی گۆڕان".
لە بڕگەیەکی تردا ناوبراو دەڵێت" ئەوەی غەمی سەرەکیی من و بەشێک لەو هاوڕێ و دۆستانەی گۆڕانە کە بە تەکەتولبازیی تاوانبارکراوین، ئەوەیە کە گۆڕان بە جورئەتەوە بەردەوام بێت لە تەحەداکردنی هەژموونی ئەم ئابوورییە چەتەگەرییە، ئەم سیستمە کلیبتۆکراسیە و بە دەنگی بەرز بڵێ نا بۆ ئەم ڕێکەوتنە ژێربەژێرە سیاسیی و ئابوورییەی نێوان بارزانیی وتورکیا کە ناوی ریفراندۆمیان لێناوە".
دەقی ڕوونکردنەوەکەی هۆشیار عه‌بدوڵا:
ڕونکردنەوەیەکی شەش خاڵی سەبارەت بە هەڵمەتێکی ڕێکخراو لەدژی بەشێک لە نەوەی نوێی ناو گۆڕان .
یەک/بەهۆی گوتارە ڕەخنەییە جدیەکانمانەوە وەک کۆمەڵێ گەنج لە نەوەی نوێی ناو گۆڕان، پارتی بە شێوەی راستەوخۆ و ناڕاستەوخۆ بەشێک لە پڕۆپارتیەکانی ناو یەکێتی و حزبەکانی تریش بە چەندین شێوە هەوڵی بێدەنگکردنمان ئەدەن ،بەو مەبەستە فشارێکی زۆر لەسەر هەندێ لە سیاسییەکانی گۆڕان هەیە بۆ ئەوەی ئەم دەنگانە پەراوێز بخرێن یا دەمکوتمان بکەن ،میدیامان بەڕودا دابخەن ، تەنانەت تا رادەی دەرکردنیش، دەرمان بکەن. بۆ ئەم مەرامەیان ، پەنا بۆ زۆر کەس و لایەنی سیاسی بردراوە ، ئەوانەی بونەتە دەهۆڵکوتی ڕیفراندۆمەکەی بارزانی ، ئەوانی حەسودی سیاسی بە درەوشاوەیی دەنگە ئازاکانی گۆڕان ئەبەن ، ئەوانەی دوکانی سیاسیان داناوە ، بە کورتی هەمو ئەوانەی لە خەتی پارتیی و ئەردۆغانیزمدا، هاوڕاییان هەیە، هەر هەموویان بە ئاواز و نەغمەی جیاواز لەسەرمان دەخوێنن و لەبەر ئەوەی شایەتومانمان بە ئەجێداکانی بارزانی و هاوئاوازەکانی بۆ ڕیفراندۆم نەهێناوە تەخوینمان دەکەن و دەیانەوێ بەهەر جۆرێک هەیە لە ژیانی سیاسی دەرمان بکەن ، لە ماوەی چەند هەفتەی ڕابردودا تەنها پاکتاوی جەستەیی و تیرۆری فیزیکی ماوە ئەگەر نا هیچ شێوازیکی ناشیاو و ناشیرین نەماوە لە دژمان نەیگرنە بەر .
دو / لە ساتەوەختێکی وەک بەزمی ڕیفراندۆما ئەبو غەمی هەمو دڵسۆزیک بۆ فکری گۆڕانخوازی چۆنێتی پاراستنی هەرێمەکەمان بوایە لە ئەجێندا شەخسی وحزبیەکانی پشت ئەو ڕیفراندۆمە ، لە وەها ساتێکدا گروپێک نابەرپرس هاتون ترسنۆکانە و لە پاشەملە و بە دیعایە ، تەپوتۆزێکیان لەسەر ئێمە دروستکردوە و تۆمەتبار دەکرێین بە تەکەتولبازیی، بە پاڵپشتیی لە هێنانەپێشەوەی کوڕی کاک نەوشیروان،هەروەها بە بنەماڵییکردنی گۆڕان، وێڕای ئەوەی ئەم تۆمەتانە، لەگەڵ فیکر و پرەنسیپی سیاسیی ئێمەدا ئاسمان و رێسمان دوورن بەڵام بەئەنقەست، لێرە ولەوێ، لەرێگەی کەناڵی جۆراوجۆرەوە، بۆ شکاندنی شکۆی کەسایەتی و مۆراڵی سیاسیی ئێمە دەکرێن و بە وردیی ئیشی لەسەر دەکەن ، ئەوە لە کاتێکایە ئەوانەی بوقی ئەم دیعایانەن لە ماوەی ڕابردودا نەیانتوانیوە بێنە ئاستی قولەپێی جورئەتی ئێمە بۆ دژایەتی دەسەڵاتی عائیلی لە کوردستاندا کە بە هەمو توانامانەوە لە بەرامبەری وەستاوینەتەوە .
ئەبێ ئەوە بڵێم و بیرم نەچێ و هێڵێکی ئەستور بێنیم بەژێر ئەو ڕاستیەدا کە زۆرێک لە گۆڕانخواز یا پەرۆشانی گوڕان بە هۆی دڵسۆزیان بۆ گۆڕان و لە ئەنجامی ئەو تەپوتۆز و گومانانەی دروستکراوە وتاری ڕەخنەیی و سەرنج و پرسیار و نیگەرانی خۆیان لەو بارەیەوە نوسیوە ، ئەو خەڵکە پەرۆشەی گۆڕان و تەوژمی گۆڕانخوازی لەگەڵ پێزانین پێیان دەڵێم دەستان خۆش بێت بەردەوامبن لە ڕەخنەکانتان و پرسیار و سەرنجەکانتان ئێوە سوپەری پاراستن و هێشتنەوەی گۆڕانن لەسەر ڕێگا ڕاستەکە و ئەو دێڕانەشم وەک هەستکردن بە بەرپرسیارێتی لەبەردەمی ئێوەدا نوسیوە .
سێ / ئەوەی غەمی سەرەکیی من و بەشێک لەو هاوڕێ و دۆستانەی گۆڕانە کە بە تەکەتولبازیی تاوانبارکراوین، ئەوەیە کە گۆڕان بە جورئەتەوە بەردەوام بێت لە تەحەداکردنی هەژموونی ئەم ئابوورییە چەتەگەرییە، ئەم سیستمە کلیبتۆکراسیە و بە دەنگی بەرز بڵێ نا بۆ ئەم ڕێکەوتنە ژێربەژێرە سیاسیی و ئابوورییەی نێوان بارزانیی وتورکیا کە ناوی ریفراندۆمیان لێناوە.ئێمە ئەمانەوێ گۆڕان بەبەرچاوڕۆشنییەوە، سیاسەت بکات و وەک ئێستا بەردەوام بێت و تەسلیمی ئەو دۆخە پڕ لە گوتارە درۆزنانەیە نەبێت کە چەتەکانی نەوت، لۆردەکانی سێکتەری وزە، بەناوی بەرژەوەندی نەتەوەییەوە بازرگانی بە مافی چارەی خۆنووسی گەلی کوردستانەوە دەکەن ، هەر لەو پێناوەشدا ئەمانەوێ بڕیاری سیاسی گوڕان لە دەستێکی ئەمینی ئازای ئەوتۆدا بێت کە دڵنیابین لانادات لە بنەما فکری و سیاسیەکانی نەوشیروان مستەفا جا کێن ئەو کەسانە بۆ ئێمە گرنگ نیە ، ئەدائی سیاسیان بۆ ئێمە دەبێتە پێوەر و لەهەمویانەوە بە یەک مەساحە دورین و بە هیواشم لە ململانێی ئاسایی و یاسایی نێوان خۆیان بە تایبەت بۆ ڕێکخەر و خانەی ڕاپەڕاندن کەس ئێمە تێوە نەگلێنێ یا بمنخاتە لایەنی خۆی ، چونکە تەنها فکری سیاسی و ئیلتیزام بە گۆڕانەوە ئێمە کۆ ئەکاتە نەک هیچ شتێکی تر .
لێرەوە کاتیەتی لەسەر ڕێکخەر و خانەی ڕاپەڕاندنیش دو قسەی ڕون بکەین ، لە دوای کۆچی کاک نەوشیروانەوە بە زۆرینەی نەوەی نوێ و بەشێک لە تێکۆشەرە دێرینەکانیشم وتوە و لە کۆبونەوەکان ڕام وابوە کە ئەبێ بازنەیەکی گەورە دروست بکەین ناوی بنێین (ڕۆڵ) هەمومان لەو بازنەیەدا بین و کەسمان لێ زیاد نەبێ و هەمو ڕۆڵی خۆمان ببینین ، لەناو ئەو بارنەیەدا دیموکراسیانە و بە پێی دەستور بەرپرسیاریەتیەکان دیاری بکەین ، نەک بە خۆ سەپاندن نەک شەرعیەتی ڕابردو ، نەک بە پەنا بردن بۆ ڕێکاری نا دیموکراسی ناشیاو ، نەک لێدان لەو عورفەی کاک نەوشیروان دایهێنا و بوە سیمای بزوتنەوەکە کە دەرفەتدانە بە نەوەی نوێ ، ململانێی نێوان نەوەکانیش جیا لەوەی ڕاستیەکی مێژوییە و لە ئەزەلەوە هەیە ، پرسێکی علمییە و ئەبێ باوەڕمان پێی هەبێت و تەندروستانە بزوتنەوەی گۆڕانی لەسەر بنەمای دەرفەتی هاوبەش پێ بەهێز بکەین.
ڕاستە ڕێکخەر بە گوێرەی دەستوری گۆڕان دەسەڵاتی زۆر نیە ، بەڵام دو مەرج زۆر گرنگن بۆ هەر کەسێک بیەوێ ئەو بەرپرسیاریەتیە وەربگرێ ، یەکیان ئەوەیە کە خاوەنی عەقڵێکی ستراتیژی بێت ، دوەمیان باوەڕی بەو مۆدێلەی ئێستای حزبایەتی ناو گۆڕان دەستورەکەی هەبوبێت یا ئێستا بە قەناعەتەوە پەسەندی بکا .
خانەی ڕاپەراندن مەکتەبی سیاسی حزبە نەریتەوانەکان نیە ناشبێ وایلێبکرێ ، خانەی جێبەجێکردنی کۆمەڵێک ئەرکی ئیختصاصیە ، لە نێوان دو کۆبونەوەی جڤاتا ، یەعنی یەکێک نوێنەر یا پەرلەمانتار نەبوبێت لە فراکسیۆنێکا ناتوانێ سکرتێری فراکسێۆنەکان بکا سەرکەوتوانە ، یەکێک ڕێکخەری ژور بوبێت و لە ئیدارەدانی ژورەکەی خۆیا سەرکەوتو نەبوبێت ناتوانێ بێتە سکرتێری هەمو ژورەکان ، کەسێک کۆمەڵناسێکی علمی نەبێت لە شێوەی کەسێکی وەک(هێمن عەبدولقادر) هەرچەندی کۆمەڵایەتی بێت بشبێتە بەرپرسی گۆشەی خەڵک سەرکەوتو نابێ ،چونکە کاری ڕێکخراوەیی دیوەخان نیە بەڵکو کارێکی بابەتی وعلمیە .
چوار / ئەم کەمپەینی ناشیرینکردنەی ئێمە (کە هەوڵ و صەفقەیەکی فرە لایەنە زۆر کەس تیایدا بەشدارن) بۆ مەساجی ئازارەکانی دەسەڵات و کۆمەڵێک ئەشخاصی بازرگانی بەناو سیاسین کە ئێمە ئێشی زۆرمان پێگەیاندوون ، بۆ ئەوەیە کە بە بێدەنگکردنمان ،بە حسابی خۆیان گۆڕان بۆ داواکانی پارتیی و یەکێتیی نەرم بێت، خاووخلیچک بێت و لەگەڵ ئەمری واقیعی دزێو وبەدی ئێستای هەرێم خۆی بگونجێنێت و لە تاڵانکردنی ئابووریی کوردستاندا بەشدار بێت ،ئەیانەوێ بێدەنگبین تا بە ئیحترامەوە گۆڕان بەرنەوە ناو دامودەزگاکانی حکومەتەوە و پەرلەمانیان بۆ کارا بکرێتەوە. بۆ ئەوەیە کە پۆستە ناشەرعیی و نادەستوورییەکانی سەرۆکایەتیی هەرێم و صەفەقاتە تیجارییە گەورەکانیان بۆ پەسەند بکرێت .
پێنج / کاتێ ئێمە ئاڵای سپی هەڵناکەین و بەردەوامین لە فەچحکردنی سیاسەت و تیجارەتی بنەماڵە سیاسییەکان ، لە رێگەی هەندێ توخم و تۆوی نامۆ بە گوتاری ڕاستەقینەی گۆڕان ، پەنا بۆ بەئەهریمەنکردنمان دەبەن، ناشیریینمان دەکەن بەوەی کە پیاوی ئەم باڵ و ئەو باڵین، کوڕی کاک نەوشیروان دەهێنینە پێشەوە ، ئەم درۆ و قسە پوچانە ڕێک جێبەجێکردنی ئەجێندای پارتی و ژوری عەمەلیاتی ڕیفراندۆمەکەی بارزانیە ، ڕاستیەکە ئەوەیەکە لە هەمبەر هەر بەلاڕێدابردنێکی گۆڕان ،ئەوە ئێمەین دێینە دەنگ و ناتوانین بێدەنگ بین نەک ئەوانەی ساڵەهای ساڵە بە ڕۆژون لە قسەکردن دژی ئەم دەسەڵاتە بنەماڵەییە گەندەڵەی خەریکە نیشتیمانەکەمان بە تەواوی وێران ئەکا .
شەش/ ئێمە تەمەنی ئەم درۆیانە، زۆر بە خێرایی کورت دەکەینەوە ، کاتێک ئەبینن کە بەردەوام دەبیین لە کار و چالاکییەکانمان و پرۆژە سیاسیی و فیکرییەکانی( فیکری سیاسیی) خۆمان بێ هیچ سڵکردنەوەیەک درێژە پێ ئەدەین و دژایەتیی خۆمان لەگەڵ مافیای تاڵانیی و ئابووریی چەتەگەریی و مەشیەخە قوبرصییەکەی سەر بە تورکیا، زیاتر و لە جاران بوێرتر خەست دەکەینەوە. لەم رێگەیەشەوە، دەمانەوێ گۆڕان بەردەوام بێت لەسەر پەیام و بۆچوونە سیاسیی و نیشتمانییەکانی کاک نەوشیروان، دژی بە بنەماڵەیکردنی دەسەڵات و گەندەڵیی و دزیی و تاڵانیی .
با هەمو ئەو دەنگە نەشاز و پڕۆپارتی و خاوەن ئەجێندا شەخصیانە بزانن بە درێژایی تەمەنی سیاسی بزوتنەوەی گوڕان ئەوە ئێمە بوین لەگەڵ گۆڕانخوازانیی تری ئازادا بێ دابران و نوچدان ، داکۆکیمان لە بنەما فکری و سیاسیەکانی ئەو پڕۆژە سیاسیە باڵایەی نەوشیروان مستەفا کرد کە لە بارە هەرە دیارەکەیدا ڕێگرتنە لە بە پشتاوپشتکردنی دەسەڵات ، ئێستاش بە حەماسی ساڵی ۲۰۰۹ ەوە و وەک ئەوەی نەوشیروان مستەفا ڕۆحی لە جەستەی زیندوتر بێت بەردەوام ئەبین، بیدەنگ نابین و تەنها مەرگ ئەمانوستێنێ .