بەگوێرەی ڕاگەیەندراوێكی بەڕێوبەرایەتی كۆمەڵگەی دەروازەی نێودەوڵەتی باشماخ كە وێنەیەكی دەست "سپی میدیا" كەوتووە لەكۆبونەوەی دوێنێی نێوان لایەنی حكومی مەرزی باشماخ دیوی ئێران و هەرێمی كوردستان، 13 پێشنیاز و ڕێنمایی گرنگ دەركران لەپێناو فراوانكردن و گەشەكردنی ئاڵوگۆڕی بازرگانی نێوانیان.

لە ناوەرۆكی ڕاگەیەندراوەكەدا هاتووە "هەردولا هەوڵدەدەن ئەو خاڵانەی لەكۆبونەوەكانی ڕابردودا بڕیاریان لەبارەوە دراوە جێبەجێبكرێت، كرێی بار هاوشێوەی مەرزەكانی دیكە كەمبكرێتەوە، هەروەها كێشەی عەلوە و بارهەڵگرەكان بەگوێرەی فەرمانی پارێزگاری سلێمانی كە لیژنەیەكی پێكهێناوە لەگەڵ كێشەی ئۆتۆمبێلی تایبەت كە خاوەنەكەی بەمەبەستی گەشتیاری بچێتە خاكی ئێران، لەگەڵ كێشەی بارهەڵگری كۆنتێنەر و تانكەر چارەسەربكرێت".

لەڕاگەیەندراوەكەدا ئەوەش خراوەتەڕوو، بڕیاردراوە هێنانی مریشك بەبەڕاد و نەهێشتنی دیاردەی قاچاخچێتی، هێنانی گاز بۆ شۆفێرە بارهەڵگرە عێراقیەكان و دانانی گازەكە لەبەنزینخانەی دەروازە و دابەشكردنی بەنرخێكی گونجاو ڕێكبخرێتەوە.

كۆمەڵگەی دەروازەی نێودەوڵەتی باشماخ ڕاشیگەیاندووە، ڕۆژی 23ی تەمموز كە دەكاتە ڕۆژی یەكشەمە كاتژمێر (5:30)خولەكی بەیانی ئۆتۆمبیلی بارهەڵگری عێراقی دەكرێنە ئەوبەر بۆ دیوی ئێران.

ئەوەش دووپاتكراوەتەوەكە "پێویستە ئۆكتانی بەنزین بەگوێرەی ڕێنمایی و مواسەفات و خشتەی سامانە سروشتیەكان بدرێتە كۆمپانیا ئێرانیەكان و هاتن و ڕۆشتنی بار تا كاتژمێر 12ی شەو دەبێت".

هەردوولاش بەپێوستیان زانیوە بۆ چارەسەری كێشە و گرفتەكان كۆببنەوە و بڕیاری هاوبەش بدەن، هەوڵیش بدرێت لەئایندەیەكی نزیكدا نرخی وەستانی ئۆتۆمبێلی بارهەڵگرەكان كەمبكرێتەوە.