رۆژنامەی "جوریزڵەم پۆست"ی ئیسرائیلی بڵاویكردەوە، وڵاتانی ئەوروپاو جیهان خۆیان لەئاست عەفریندا "كەڕو كوێر" كردووە و هۆکاری ئەوەش "بەرژەوەندی هاوبەشی نێوان یاریزانە سەرەكییەكانی جەنگی سوریایە".
رۆژنامەكە ئاماژەی بەوەكردووە، "كوردانی رۆژئاوای كوردستان ساڵانێك هەوڵی بەدەستهێنانی هاوسۆزی وڵاتانی ئەوروپا و جیهانیانداوە، هاوكات هەوڵی بەدەستهێنانی دروستكردنی ناوچە دژی فڕینیان داوە لە حەلەب، بەڵام شكستیانهێناوە".
رۆژنامەكە نوسیویەتی، "كوردەكانی عەفرین لەژێر بۆردومانی فڕۆكەكاندا دەڵێن جیهان وازی لێمان هێناوە، بەڵام راستیەكە ئەوەیە كە سیاسەتی گاڵتەجاڕانە و بەرژەوەندی هاوبەشی نێوان یاریزانە سەرەكییەكانی جەنگی سوریا وایكردووە خۆیان لە ئاستی قەیرانە مرۆیەكانی عەفرین كوێر بكەن".
لە درێژەی راپۆرتەكەدا ئاماژەی بە شەهیدكردنی هاوڵاتیانی مەدەنی عەفرین و تێكدانی خانوو ماڵی و خاپوركردنی هێڵەكانی پەیوەندی كراوە لە عەفرین.
رۆژنامەكە هاوكات باسی لەوەش كردووە، "رێكخراوەكانی كۆمەڵگەی مەدەنی و مافەكانی مرۆڤ لە ئاستی پێوستدا نەبوون لە گەیاندنی ئازاری كوردەكانی سوریا، بە ئەندازەی ئەوەی كوشتن و قەیرانی مرۆیی لە غوتەی رۆژهەڵات ئیدانە دەكەن و هەوڵی سنورداركردنی توندو تیژییەكان لە عەفرین لە ئاست پێوست نەبووە".