پەرلەمانتاری گۆڕان، کاوە محەمەد پێیوایە مانەوەی ئەم نوخبە دەسەڵاتدارو حیزبانەی ٢٧ ساڵە حوکمی کوردستان دەکەن، دەبێت خەڵکی کوردستان چاوەڕێی کارەساتی گەورەتر بکات.
لە چاوپێکەوتنێک لەگەڵ سپی، کاوە محەمەد پەرلەمانتاری گۆڕان لە پەرلەمانی عێراق رایگەیاند" لەساڵانی رابردووە تا ئێستا، هیچ کاتێک هێندەی ئێستا کورد لە عێراقدا لاواز نەبووە، هۆکاری سەرەکی ئەو لاوازبوونەش ئەنجامدانی ریفراندۆم بوو کە ئەویش بۆخۆی بەرەئەنجامی دەسەڵاتدارێتی ٢٧ ساڵەی دوای راپەرینی ئەم دوو حیزبەیە کە کوردستانی گەیاندۆتە ئەم دۆخە، ئەویش ئەنجامی ئەو سیاسەتەیە کە دەسەڵاتدارانی هەرێم لەسەر ئاستی ناوخۆی و هەرێمایەتی و نێودەوڵەتی بەدرێژایی ئەو چەند ساڵە پیادەیان کردووە".
کاوە محەمەد ئاماژە بۆ ئەوە دەکات کە بەدرێژای ئەو ماوەیە، پەیوەندی نێوان هەرێم و بەغدا، پەیوەندیەکی نا نیشتمانی و نا دامەزراوەیی بووە، پەیوەندیەک بووە لە روانگەی بەرژەوەندی حیزبی و شەخسیەوە بنیات نراوە.
پەرلەمانتارەکەی گۆڕان، مەترسی مانەوەی ئەم نوخبە سیاسیە ئاشکرا دەکات، ئەو پێیوایە مانەوەی ئەم نوخبە دەسەڵاتە دەبێت خەڵکی کوردستان چاوەڕێ کارەساتی گەورەتر بکات و، وتی " مانەوەی ئەم نوخبەیە، واتە دەبێت چاوەڕوانی ئەوەبین کورد لاوزاتربێت، کورد بەدەست سیاسەتی شکستخواردوویانەوە بناڵێنێت، سیاسەتی ئەم نوخبەیە خەڵکی کوردستانی بێ تاقەت کردووەو دووچاری نا ئۆمیدی کردوون، بەڵام دەبێت ئەم دۆخە وا لە خەڵک بکات بە ئیرادەیەکی نوێوە بێتەوە مەیدان و، چیتر ئەم دۆخە قبوڵ نەکەن، لە هەڵبژاردنەکانی ئەمساڵیش لە لەپێش هەموویانەوە هەڵبژاردنی پەرلەمانی عێراق دەرفەتێکە کە دەبێت خەڵکی کوردستان سزای قورسی ئەو دەسەڵاتدارانە بدەن و، جارێکی تر متمانە بەوانە نەدەنەوەو، سەرەتایەکی نوێ لە حوکمڕانی دەست پێبکەنەوە".
کاوە محەمەد هەڵوێستە " کورت بینەکانی " ئەم نوخبەیە بیری خەڵکی کوردستان دەخاتەوەو دەڵێت " لەکاتی ریفراندۆمدا بەپرسانێکی ئەم هەرێمە دەیانوت مادەی ١٤٠ کۆتایی هاتووە، سنوری کوردستان بەخوێن دیاری دەکەین، بەراستی ئەو لێدوانانە لێدوانی کەسانێکی سیاسی وردبین نییە، ئێوە دەزانن ئەو دەرفەتەی لەساڵی ٢٠١٤ بۆ کورد هاتە ئاراوە کە سووپای عێراق لەبەردەم هێرشی داعشدا پاشەکشەی کرد، ئیرادەی نوخبەی دەسەڵاتداری کورد خۆی بەسەر ناوچە جێناکۆکەکان فەرزکرد، بەڵام نەچووە سەر، هەر وەک ئێستا خۆ فەرزکردنی هێزەکانی عێراق بەسەر ئەو ناوچانەدا هەڵەیەو، دەبێت ئەو ناوچانە بەهاوبەشی بەڕێوەببرێت، نەک نموونە ناشرینەکانی رابروو دوبارە بکرێتەوە".
ناوبراو پێیوانی یە، عێراق نموونەیەکی جوان و گەشاوەبێت لە ناوچەکەدا، بەڵام پێێوایە لەهەرێم لەپێشترە، ئەو دەڵێت" ئەگەر عێراق نموونەیەکی خراپی ناوچەکە بێت، ئەوا هەرێم نموونەیەکی زۆر خراپترینەو، خراپترە لەعێراق، عێراق لە رووی دامەزراوەییە زۆر لەپێش کوردستانەوەیە، پەرلەمانی عێراق خاوەن دەسەڵات و کارایە چەندان وەزیر و بەرپرسی بانگهێشت کردووەو متمانەی لێ سەندوونەتەوە، دەستەی نەزاهە بەدوای گەندەڵکارانەوەیەوەو دۆکۆمێنتی گەندەڵیان لەسەر کۆدەکاتەوەو رووبەرووی دادگایان دەکاتەوە، لەرووی جێگۆڕکێی دەسەڵاتەوە بەغدا زۆر لە پێشترە، هەڵبژاردن لەکاتی خۆیدا ئەنجام دەدرێت، لە رووی شەفافیەت بەتایبەتی لەبواری نەوتدا زۆر لەهەرێم شەفافترە".
دەربارەی ناردنی بڕی ٣١٧ ملیار دینار لەبەغداوەو ئەگەری بەردەوامبوونی، کاوە محەمەد دەڵێت" ئەو پارەیە خەڵک دڵنیا ناکاتەوە، چونکە حکومەتی هەرێم هیچ پلانێکی نییە، ئەو دەڵێت ئەگەر بەغدا پارە بدات، ئەگەر ئەمەریکا پارە بدات، ئەمە دڵنیایی نادات بە هاوڵاتیان، جگە لەوەی ئەگەری ئەوە هەیە ئەو بڕە پارەیەی بەغدا دەینێرێت بەردەوام نەبێت، چونکە بەپێی یاسای بودجە دەبێت هەرێم رۆژانە بڕی ٢٥٠ هەزار بەرمیل لە رێگای سۆموە بفرۆشێت و داهاتەکەی بچێتە ژێر دەستی بەغدا، بەڵام تا ئێستا حکومەتی هەرێم ئەو کارەی نەکردووە، هەروەها دوای هەڵبژرادن نازانێرێت حکومەت چۆن پێکدەهێنرێت، ئایا پابەند دەبێت بەو بڕە پارەیەوە، لەبەرئەوە ئەو دەستکاریکردنی مووچەیە دڵنیای نادات بەهاوڵاتیان".
دەقی چاوپێکەوتنەکە ببینە..