جوڵانەوەی نەوەی نوێ لەبارەی ڕووداوی ئاگرکەوتنەوە لە بازاڕی لەنگەی هەولێر بەیاننامەیەکی بڵاوکردەوە و ڕایگەیاندووە "پشتیوانی تەواوی خۆمان بۆ خۆپیشاندانی کاسبکارانی زیان لێکەوتووانی بازاڕی لەنگەی هەولێر ڕادەگەیەنین".
لە بەیاننامەکەدا کە وێنەیەکی بۆ "سپی میدیا" نێردراوە هاتووە "ناکرێت جوت حیزب و جوت بنەمالە سەرباری بە تاڵانبردنی نەوت و داهاتی ناوخۆ و قووت و مووچەی هاوڵاتیان و فەرمانبەران، ئێستا دێن و تەماع دەکەنە سەر موڵک و کەسابەتی کۆمەڵێك دوکانداری فەقیر و هەژاری شاری هەولێر و بژێوی ژیانی سەدان و هەزاران خێزان دەبڕن".
دەقی بەیاننامەکە:
هەمومان پێویستە لەسەر ئەو زوڵم و ناحەقییە بێینە دەنگ و پشتیوانی کاسبکارانی بازاری لەنگەی هەولێر بکەین
ئێمە وەک جوڵانەوەی نەوەی نوێ پشتیوانی تەواوی خۆمان بۆ خۆپیشاندانی کاسبکارانی زیان لێکەوتووانی بازاڕی لەنگەی هەولێر ڕادەگەیەنین و پێویستە دەستبەجێ قەبارەی زیانەکان دیاری بکرێت و قەرەبووی کاسبکاران بکرێتەوە.
هەروەها ناکرێت جوت حیزب و جوت بنەمالە سەرباری بە تاڵانبردنی نەوت و داهاتی ناوخۆ و قووت و مووچەی هاوڵاتیان و فەرمانبەران، ئێستا دێن و تەماع دەکەنە سەر موڵک و کەسابەتی کۆمەڵێك دوکانداری فەقیر و هەژاری شاری هەولێر و بژێوی ژیانی سەدان و هەزاران خێزان دەبڕن.
سەرباری دووپاتکردنەوەی پشتگیری جولانەوەکە بۆ ئەو کاسبکار و دوکاندارە زیان لێکەوتوانە، داواکارین هاوڵاتیانی ئەزیزی شاری هەولێر پشتیوانی لەو دوکاندارانە بکەن و هەموان پێکەوە بەشداربن لە دەربڕینی ناڕەزایی و خۆپیشاندان، و چیتر نەهێڵین دەسەلاتدارانی هەرێم بێباك بن بەرامبەر بە قووتی هاوڵاتیان.
جوڵانەوەی نەوەی نوێ
٢٠١٨/١٠/٢٦