لەسەروبەندی دانوستانەكانی ئاشتی لە ئەفغانستان، وتەبێژی تاڵیبان ڕایگەیاند کە هەمان شێوازی ساڵی 1996 لەو وڵاتەدا بەکارناهێنێت.
زەبیحوڵا موجاهید وتەبێژی بزوتنەوەی تاڵیبان، لە چاوپێكەوتنێكدا لەگەڵ ئاژانسی هەواڵی رۆیتەرز رایگەیاند: ئەگەر رێككەوتنی ئاشتی لەنێوان حكومەتی كابول و تاڵیبان ئیمزا بكرێت، بزوتنەوەكەی هەمان شێوازی حوكمڕانی سەردەمی ساڵی 1996 لەو وڵاتەدا بەكارناهێنێت و دەمانەوێت دڵنیایی بدەینە هاوڵاتیان كە لەلایەن ئێمەوە مەترسی بۆ سەر ژیانیان دروست نابێت.
زەبیحوڵا موجاهید لەدرێژەی چاوپێكەوتنەكەیدا وتیشی: سەرخستنی رێككەوتنی ئاشتی نێوان حكومەتی كابول و بزوتنەوەكەی، بەندە بە كشانەوەی هێزە بیانییەكان لە ئەفعانستان.
لێدوانەكەی وتەبێژی بزوتنەوەی تاڵیبان لەكاتێكدایە كە لەماوەی سێ مانگی رابردوودا، لێپرسراوانی ئیدارەی واشنتۆن و بزوتنەوەی تاڵیبان، زنجیرەیەك دیدارو كۆبوونەوەیان ئەنجامداوە، بەمەبەستی ئیمزاكردنی رێككەوتنی ئاشتی، بەڵام تا ئێستا دەر ئەنجامەکان ڕوون نییە.