برای بەڕێزمان "د. چیا" ووتارێكی ووردی لەسەر "خاوەنداریەتی میدیای گۆڕان" بڵاو كردۆتەوە.
ئەو كە نزیكەی پەنجا ساڵە بێ وچان و دابڕان لە كۆلێژی پزیشكی یەوە تا ئەم تەمەنەی لە بزوتنەوەی كوردایەتیدا، بەردەوامە و ناوێكی دیارە، هاوڕێ نزیكی گشت وێستگەكانی ژیانی سیاسی و كۆمەڵایەتی "نەوشیروان مستەفا"ش بووە، لە دوا قۆناغیشدا، دەور و كاریگەری لە دامەزراندن و بەردەوامی بزوتنەوەی گۆڕاندا ، هەبووە. شایەتێكی زیندوی ڕوداوەكان و خاوەنی هەزاران بەڵگە و دۆكۆمێنتی ئەو مێژووەشە كە خەباتی تێدا كردووە. یەكێكیشە لەو چەند كەسەی كە لە دوامانگەكانی تەمەنی ئەو زاتە گەورەیەدا و لە ئاویلەكەدا ، هاوخەم و خانە و ئازاری بووە.
ئێستاش پەرۆش و پڕ خەمی بزوتنەوەی گۆڕانی دوای نەوشیروان مستەفایە، بە هەموو توانای ( ڕەخنە ، ڕێنمایی، نامە و پەیوەندی شەخصی) لە هەوڵی بەلاڕێدا نەبردن و مانەوە و گەشەی بزوتنەوەكەدایە . ووتار و نوسینی ئەمجارەشی پڕاوپڕ لە زانیاری ، گلەیی و بێئومێدی یە، كە مایەی هەڵوەستە لەسەر كردنە. ئەگەر بمبەخشێ و بتوانم بەهەمان مەبەست و ئامانجی ئەو بۆ مێژوو شیكردنەوەیەك و تەواوكاریەك بۆ نوسینەكەی بكەم.
پێش 1/3/2015 و دەستبەكاربونی من وەك بەرپرسی میدیای گۆڕان، كاك نەوشیروان دەستنوسی چەند پرۆژەیەكی بۆ خوێندنەوە، تایبەت بە ئایندەی كاری ڕاگەیاندنی بزوتنەوەی گۆڕان پێدام. خاڵی جەوهەری هاوبەشی كۆی پرۆژەكان یەكخستن و كۆكردنەوەی ئۆرگانەكانی ڕاگەیاندنی بزوتنەوەكە بوو، لە یەك دامەزراوەدا، دوای گفتوگۆ و ڕاگۆڕینەوە پرۆژەیەكی تەواو لای خۆیەوە تەبەنی كرا، ستونە گرنكەكانی بریتیبون لە :
أ-دروستكردنی یەك تۆڕی هەواڵی یەكگرتوو بۆ ( TV ، ڕادیۆ ، پێگە ئەلەكترۆنیەكان).
ب-سود وەرگرتن لە توانای گشتی كادرەكان بە بێ جیاوازیكردن لە ئۆرگانەكانیان و بە پێی پێویست تەوزیفكردنیان.
ج-بەڕێوەبردنی لەلایەن یەكەیەكی كارگێڕی و ژمێریاری یەكگرتوو .
كە پێشتر بە پێچەوانەی ئەم سێ پرەنسیپە، كاری ئەو ئۆرگانانە ڕێكخرابوو ، هەر خۆیشی ناوی (میدیای گۆڕان)ی بە پەسەندزانی بۆ دامەزراوەكە و پێی وابوو ئەو ئۆرگانانە بە ناوە جیاوازەكانیانەوە، وەك پێناس و ماركەی گۆڕان لەناو خەڵكی كوردستاندا، بڵاو و ناسراو و جێگیر بوون، چڤاتی نیشتیمانیشی ڕاسپارد كە چیتر تەنیا یەك كەس لەو میدیایە نوێنەرایەتی و ئەندامێتی لە كۆبونەوەكاندا، دەبێت .
میدیای گۆڕان، وەك ئۆرگانێكی نوێ ، (غەزەبی چەند هەڵسوڕاوێك) و چەند بەرپرسێكی باڵاشی لە بزوتنەوەكەدا وروژاند، هەر لە سەرەتاشەوە لەوانەوە دەستیپێكرد كە خۆیان پرۆژەیان بۆ یەكخستنی نوسیبو (بە ئیمزای خۆیان پارێزراوە). لەناوی ئۆرگانەكەوە بۆ هەرسێ ستونەكە كەوتنە بەر شاڵاوی ڕەخنە و گلەیی هەندێ جار تۆمەتی ناڕەواش، كاركردن بۆ تێكدانی یەك تیمی و پێكەوەیی، ساردكرنەوەی كادرەكان و پرتەو بۆڵە ، وێڕای جەختكردنەوەی كاك نەوشیروان و چەندین پسپۆری ئیداری و دارایی تا ئێستاشی لەسەر بێ هاوكاری نەكردنی كارگێڕی و جێگیرنەكردنی میزانیەی ساڵانە و چەندین كێشەی لابەلای تر ، كە ئەگەر پشتیوانی ئەو زاتە نەبوایە هەر زوو بە دەردی هەڵوەشاندنەوە دەچوو،كە ئێستاو لە دوای مەرگی بە كردار هەڵیانوەشاندەوە.
پاش ئەوەی ململانێ و كێشەی نێوان ئەو هاوڕێیانەی گروپی ڕاوێژ و خانەی ڕاپەڕاندن، بە تایبەت لەسەر ئەو مەسەلەیە بۆ ناو ئۆرگانەكانی تر شۆڕبۆوە و چووە سەر لاپەڕەی ڕۆژنامەكان، بەناچاری ئەبێت بنوسین و بڵێین ( بە شانازی یەوە توانیبومان بلانسێك لە نێوان دید و بۆچونە جیاوازەكان، تەنانەت ململانێكانیشدا، ڕابگرین كە كار نەكاتە سەر بزوتنەوەكە و لەناو كاروكرداری ڕۆژانەی كادرەكاندا ، ڕەنگنەداتەوە . وێڕای گلەیی ئەم یان ئەو لەسەر ئەدا و چۆنیەتی بڕیار و بەڕێوەبردنی میدیا كە زۆر جار ڕاگرتنی ئەو تەوازونەش ببوە گلەیی لەسەرمان ( نمونەی زۆر لەم ڕووەوە لە تۆماری كاری ڕۆژانەماندا نوسراوە).
(ڕەوشی ئاڵۆزی میدیای گۆڕان)، لە ڕاستیدا پێش مەرگ و دوای سەفەری كاك نەوشیروان دروستكرا و برەوی پێدرا ، خاوەندارێتی میدیاكە و بە تایبەت تەلەفزیۆنەكە، كە دكتۆر چیا بە ( بوئرەی ساخن) ناوی دەبات ، لەگەڵ پێزانینی هەندێك سەركردە لە نەخۆشیەكەی ئەو پیاوە، گەرم و گەرمتر بوو، بەندە لە كۆتایی سالێی (2016) دا و بەو مەبەستە بە پیر داوایەكی ژووری یاسایی بزوتنەوەكەوە چوم، ئەوەی لە توانامدا بێت بۆر ِێگری لە هەنگاوی ئەملا و كرداری ئەولا كردومە، بە پیر زۆر بۆچونی كەسانی دڵسۆزیشەوە ڕۆشتین. بەڵام بەداخەوە لە كاتی خۆیدا، بە بێ چارەسەری بنەڕەتی خەفە كرا. لەو پێناوەشدا بەرگەی زۆر تۆمەت و تەشهیر و ناوزڕاندنمان گرت. كە لەلایەن جەمسەری هاوكێشەكانەوە ئاراستەمان دەكرا، چونكە پێیانوابو ئێمە ڕێگر و لەمپەری پاوانی دەسەڵاتی ئەوانین.
ئەو سێ گروپەی دكتور چیا باسی دەكات، كەم تا زۆر موبەریری (یاسایی، كارگێڕی،حیزبی، ڕێكخراوەیی و مادی و مەعنەوی)یان بۆ خاوەندارێتی ئەو میدیایە هەیە، بەڵام ڕێگەی دروست و دەستوری بۆ شیكاری ئەو هاوكێشەیە و بڕیاردان لەسەر ئەنجامی كۆتایی وەك خۆی ئاماژەی پێداوە تەنیا (چڤاتی نیشتیمانی بزوتنەوەی گۆڕان)ە، هەر ڕێگەچارەسەر و بڕیارێكیتر لە دەرەوەی ئەو چڤاتە ، هاوكێشەكە پڕ گرێوگۆڵتر دەكات و هیچی لێ سەوز نابێت .