بەڕێزان کاك شوان محمد و
هاوکارانی لە سپی میدیای ئازیز
بە بۆنەی ساڵڕۆژی دامەزراندنی دەزگا میدیایی و پێگە ئازا و ئازاد و راستگۆکەی سپی میدیاوە گەرمترین پیرۆزباییتان لێ دەکەم .
سپی میدیا سەرباری ئەوەی روی سپی و جوانە لە نێو میدیای ئەلکترۆنییدا ، وەك روی پەڕەش سپییە و نوسینی هەمو قەڵەمێکی ئازاد و ئازا دەگرێتە خۆی .
راستە تا ئێستا لە ناوچەکە بە گشتیی ،لەهەرێمی کوردستانی عێراق و عێراق خۆیشی،بە تایبەتیی ئەو فەزا و مەودا ئازادییە لە ئارادا نییە ، بەڵام پێگەیەکی وەك سپی میدیا توانیویەتیی بوارێك بڕەخسێنێت تا قەڵەمە ئازا و ئازاد و راستگۆکان بێنە گۆ و راستییەکان بدرکێنن . سپی میدیا قۆرخی هیچ ئایدیا و مەدرەسەیەکی سیاسیی و ئایدۆلۆژیای تایبەت نییە ، لەوپەڕی ئیسلامیی تا ئەوپەڕی بێ باوەڕیی قسەی خۆیانی تیادا دەکەن لە چوارچێوەی پیشەیی بونی رۆژنامەگەرییدا .بۆیە ئێمەومامانیش هەمیشە بۆی دەنوسین و بینەر و خوێنەری هەمیشەیین .
سپی میدیا بە رەچاوکردنی عورفی رۆژنامەگەریی بەردەوامە لە سەر رێچکەکەی خۆی کە خستنە روی راستییەکان و فراوانکردنی پانتایی بیرو ڕای ئازاد و رێزگرتنی بۆچون و جیهانبینیی بەرامبەرە.
بەندە وەك خوێنەر و هاوکارێکی ئەم پێگە ئازیزە هیچ کاتێك هێڵی سورم بۆ نەکێشراوە لە بڵاو کردنەوەی نوسینەکانمدا ،ئەوەش هانم دەدات کە رۆژانە سەردانی بکەم و هەواڵ و بابەتەکانی بخوێنمەوە .
هیوادارم سپی میدیا هەر لە گەشە و پێشکەوتنی زیاتردا ببینین تا خزمەتی زیاتری ئازادیی بیرو ڕا بکات . دوبارە پیرۆزبایی لە خۆمانی خوێنەر و سەرنوسەر و دەستەی بەڕێوەبەران و تەکنیسینەکانی سپی میدیا دەکەم هەر سەرکەوتو بن .
بارزان شێخ عوسمان