زۆر لە مێژ بو وەك کوردێك ،وەك نوسەر ورۆژنامەنوسێك ،وەك ئەندامێکی نێو ریزەکانی ی ن ك کەرۆژگارێك پێشمەرگە بوم و لە دەزگای راگەیاندنی حزبەکەم کارم کردوە ، چاوەڕێم دەکرد بەڕێز سەرۆك مەسعود بارزانی سەرۆکی پ د ك ،بەوتەیەك ئاوێك بکات بەو ئاگری گرژییەی کە لە نێوان هێزە سیاسییەکان دروست بوە بەتایبەتیی لە نێوان ی ن ك و پ د ك دا .
خۆشبەختانە ئەو وتەیەم لە بەڕێزیانەوە بیست کە وەك دەستپێشخەرییەک لێی دەڕوانرێت . مەکتەبی سیاسیی پ د ک یش لە بەیانێکدا وەك فەرمانێك ئاماژەی بۆ دەکات بۆ حزبەکەیان .
زۆر گرنگە ئاشتیی و تەبایی بگەڕێتەوە بۆ هەرێمی کوردستانی عێراق ،هەم بۆ مامەڵە کردن لەگەڵ ئاڵنگارییەکان دا ،هەم بۆ دروستبونەوەی متمانەی خەڵك بە باری سیاسیی و ئایندەی هەرێمەکەمان .
بەندە وەك نوسەر و رۆژنامە نوسێك قسە دەکەم و دەنوسم . بۆیە ئەگەر لە میانەی نوسینەکەدا باسیی ی ن ك بکەم ،ئەوا گوزارشت لە روانینی خۆم دەکەم و هیچی تر ،دەنا ی ن ك وتەبێژ و راگەیاندن و مەکتەبی سیاسیی خۆی هەیە .
کاتی خۆی ساڵی ٢٠٠٦ بەڕێز نێچیرڤان بارزانی سەرۆکی هەرێمی کوردستان لە میانەی دیدارێکیدا لە یادی دامەزراندنی ی ن ك دا قسەی راست وراشکاوانەی کرد کە "ئەم حزبە بۆ دژایەتیی پ د ك دروست نەبوە بوە”. ئەو وتەیە ئاماژەیەکی گرنگ بو کە چ (ی ن ك) یا ( پ دك )، دوژمنی یەکتر نین بەڵکو دو حزبن هەریەکەیان جیهان بینیی و روانینی خۆیان هەیە ،بەڵام دەتوانن پێکەوە هەڵ بکەن . ئەوەش مانای وایە چەند کێشە و شەڕیشیان هەبوبێت سەرەنجام مێزی گفتوگۆ کۆی کردونەتەوە و خاڵە هاوبەشەکانیان بۆ خزمەتکردنی خاك و خەڵکی کوردستان رێکی خستون .
دەستپێشخەرییەکەی سەرۆك مەسعود بارزانی زۆر مەسولانە و لە جێی خۆیدا بو کە هەر دەبوایە لەلایەن بەڕێزیانەوە بوایە . سەرۆك بارزانی داوایکرد پێش هەژدەی ئەم مانگە مەکتەبی سیاسیی هەردولا کۆببنەوە بە ئامانجی چارەسەرکردنی کێشەکان .
راستە بە کۆبونەوەیەكی هەردولا تەواوی کێشەکان چارەسەر نابن تا ئیتر رێگاکە گوڵڕێژ بێت ،بەڵام ئەگەر ئیرادە و خواستی ئاشتیی بە جدیی هەبێت رەنگە دانیشتنەکان زوتر هەنگاوی باشیان لێ بکەوێتەوە بەو پێیەی هەردولا ئۆباڵی ژیاندن و بەڕێوەبردن و پاراستنی ژیانی نزیکەی چوار ملیۆن هاوڵاتییان لە ئەستۆدا یە .
پەیوەندییەکانی نێوان پارتی دیموکراتی کوردستان و یەکێتیی نیشتمانیی کوردستان ،لە رابردودا هەوراز و نشێوی زۆریان بە خۆوە بینیوە ، بەڵام نەگەیشتۆتە پچڕان . تەنانەت لە کاتی شەڕە نەگریسە کوردکوژەکەی ناوخۆشدا ، تاڵە موەکەی پەیوەندییەکان نەپچڕابو .کەواتە دیموکراتیی و نیشتمانیی قەدەریان وایە هەر دەبێت پێکەوە کار بکەن ، هەر بۆیە گرژیی نێوانیان نەك هەر کاردەکاتە سەر یەکڕیزیی نیشتمانیی لە ناوخۆ و بەغدا و ناوچەکەو جیهاندا ،بەڵکو لە ژیان و گوزەران و خزمەتگوزارییەکانیشدا بۆ کۆمەڵانی خەڵك ، تەنانەت میزاجی هاوڵاتیانیش .
ی ن ك و پ دك پێکەوە نەبونایە هەرگیز بەرنامەو پلانی راپەڕینی ئازاری ١٩٩١ سەری نەدەگرت ،بە بروسکەکانی نێوان سەرۆك مامجەلال و رابەری مەزن کاك نەوشیروان لەگەڵ سەرۆك بارزانییدا ،دەردەکەوێت کە ئەو پەیوەندییە پڕ تەباییە چۆن رۆچوبوە خوارەوە کە بوە فاکتەری سەرکەوتنی راپەڕین . لە هەڵبژاردنی یەکەمین پەرلەمانی خەڵکی کوردستانیشدا حیکمەتی هەردو سەرۆك مامجەلال بارزانی بوە مایەی سەرخستنی ئەزمونەکە .لەدوای رێککەوتنامەی واشنتنیشدا کاری پێکەوەیی هەردو سەرۆك ،دەستکەوتی زۆر و زەوەندی بۆ گەلەکەمان لە کوردستان و عێراقدا بەدەستهێنا ، ئارامییەکی بێ وێنە. و خۆشگوزەرانیی و ئاوەدانیی یەکی بێ وێنەی هێنابوە ئاراوە ،کە سەرۆك نێچیرڤان بارزانی لە سەرەتای ئەم مانگەدا لە هەولێر ئاماژەی بۆ کرد کە "سەرۆك مامجەلال و سەرۆك بارزانی کاری زۆریان بۆ کورد وعێراقییەکانی تریش کردوە ".
ئەوەش بەرهەمی تەبایی و پێکەوە هەڵکردن بوە .
ئێستا کاتی ئەوەیە کە هەمولایەك بە تایبەتیی ی ن ك و پ د ك بەستەڵەك و بەربەستە دەرونییەکانیان بشکێنن و لە پێناوی بەرژەوەندییەکانی گەلەکەمان دڕ بە مەحاڵ بدەن و ئاشتییەکی رەواو راستەقینە بۆ هەرێمەکەمان بهێننە ئاراوە ،بە بڕوای بەندە، سەرۆك بارزانی دەتوانێت لەمەشدا دەستپێشخەر بێت و خۆی هەردولا کۆ بکاتەوە و سەرپەرشتیی کۆبونەوەکەیان بکات ،ئیتر هیچ بیانویەك نامێنێت بۆ سەرخستنی دەستپێشخەرییەکەی کە رۆژی کردنەوەی مۆزەخانەی نیشتمانیی بارزانی خستیە رو ،بەوەش هەمو دڕدۆنگیی و حەساسێتێك دەڕەوێتەوە .دەکرێت بەڕێزیان بە هەمان گیانی سەرۆك مامجەلال کار بکات بۆ باڵا خستنی بەرژەوەندییەکانی گەل ، کە هەرگیز نەدەسڵەمییەوە لە شکاندنی بەستەڵەکە دەرونیی و حزبییەکان .
بەرژەوەندییەکانی گەلی پێ لە هەمو گرنگتر بو .
بەو هیوایەی سەرۆک مەسعود بارزانی خۆی پێش هەژدەی مانگ دەستپێشخەرییەکی مامجەلال ئاسا بکات .