کەسێتى موقتەدا سەدر و
گروپى سەدریەکان بە درێژاىی ساڵەکانى عێراقى تازەى دواى بەعس بەردەوام روداوى گەرمى
نێو پێشهات و ململانێ ئاڵۆزە سیاسیەکان بون ، سەربارى دژ بەیەکى و هەندێ جار ناڕاستى
لە هەڵوێست و کاردانەوەکانیاندا سەدر و سەدریەکان جیاواز لە گروپ و کارەکتەرە سیاسیەکانى
تر لە هەموو دۆخێکدا دەبنە بابەتى گەرم و بۆ پێشخستن بێ یان پەکخستن رۆڵگێڕی دیارى
زۆربەى روداوەکانن ، شەڕى وەدەرنانى ئەمریکاو
هاوپەیمانەکانى لەعێراق و روبەڕوبونەوەى چەند جارەى چەکدارى لەگەڵ هێزەکانى ئەمریکا
، دژایەتى حکومەت و پێکدادانى چەکدارى توند لەگەڵ پۆلیس و سوپاى سەردەمى کابینەکەى
نورى مالکى ، بەشدارى کردنى حکومەت و پێگە هەستیارەکانى دەوڵەت و دواتر رژانە سەرشەقامەکان
و خۆپیشاندان و نوێژى بەکۆمەڵ ، راگەیاندنى بایکۆتى هەڵبژاردن و دواتر پەشیمانبونەوەو
بەشدارى کردن لە هەڵبژاردن ، داواکارى بۆ پێکهێنانى حکومەتى زۆرینەو لەپڕ دەست پێ
لەکارکێشانەوەى جێگرى سەرۆکى پارلەمان و پارلەمانتارانى فراکسیۆنەکەی و دواتر
ناردنیان وەک خۆپیشاندەر بۆ هەڵکوتانە سەر پارلەمان ، گۆڕینى هەڵوێست لە دۆستایەتى
و پشتیوانى قوڵەوە بۆ دوژمنایەتی سىەخت لەگەڵ نورى مالکى ، تەواوکردنى خوێندنى باڵاى
ئاینی لە حەوزەى زانستى قوم و دواتر چونە نێو بەرەى دژایەتى ئێران ، لە دژایەتى پێشمەرگەو
هەرێمى کوردستانەوە بۆ هاوپەیمان و شەریکى پارتى دیموکرات ، لە گرنگترین و سەیرترین
هەڵویست و جوڵە سیاسیە دژ بەیەکەکانى موقتەدا سەدرو گروپى سەدریەکانن .
ئێستا چیتر عیراق بەتەنها
گیرۆدەى کێشەى قوڵى ململانێ مەزهەبى و نەتەوەیەکانى نیە ، ئەگەر ساڵەکانى سەرەتاى
دواى نەمانى بەعس نێوانى کورد لەگەڵ عەرەب و نێوانى شیعە لەگەل سونە لە بەربەستە دیارەکانى
بەردەم ئیدارەو سیاسەت و رێکەوتن و پشکپشکێنەى پێکهێنانى کابینەکانى حکومەت و پێکەوە
ژیان بوبن ، ئەوا ئێستا کیشەى گەورە و مەترسى ئاشکرا ململانێى توندى نێوخۆى گروپەکانى
هەر یەک لەو پێکهاتانەن کە جگە لە کیشەکانى یەکێتى و پارتى و دووبەرەکى توندى نێوان
شیعەکان کە گرفتى گەورەى بەردەم داهاتوى نادیار و ناڕونى عێراقن ئیستا موقتەدا سەدر
وەک دیاردە بە تەنها خۆى و پشت ئەستور بە جەماوەرێکى فراوانى گوێڕایەڵى ئامادەو دەست
لەسەر سنگ ، لە دەسەڵات بێ یان ئۆپۆزسیۆن رۆڵگێرو دروستکەرێکى خێراى گرفتە بۆ لایەنەکانى
بەرانبەرو نەیارەکانى .
سەدر پێکهێنەرى حکومەت
بێ یان وەک خۆى ئەڵێ دور لە حکومەت و لەناو شەقام ئەوا ئەگەر چارەسەریشى پێ نەبێ هەمیشە
بەچەند پاکێجێک پلانى بۆ تیکدان و رێگرى و وروژاندن ئامادەیە ، ئەوەتا کاتێک خۆى و
بەرەکەى تواناى تێپەڕاندنى بەربەستە یاساییەکانى پێکهێنانى حکومەتیان نەماو کاندیدى
پێشنیازکراوى خۆى سەرنەکەوت ، بۆ رێگرى لە پێکهێنانى کابینەى حکومەت و لە کاندیدى
دەستنیشانکراوى بەرانبەرەکانى دۆخێکى شڵەژان و نا ئارامى سیاسى ئەوتۆى دروست کردوە
کە کۆتاییەکەى دیار نیە .
بڕیارو هەڵویستە خێراو
دژ بەیەکەکانى ژێر عاباکەى موقتەدا سەدر عێراقى نا ئارام و نا سەقامگیرى سیاسى و گیرۆدەى
دەست ناکۆکى تائیفى و دەستوەردانى هەرێمى و نێودەوڵەتى و بێ توانایی بڕیاردانى سیاسىیەکانى
خستۆتە بەردەم ئایندەیەکى خراپى پڕکێشەى بەردەوامى بێ چارەسەرەوە .