چۆن ڕێگا لە کاروانی بەرەو (پیرمام) بگرین؟ (بابەتێك بۆ گفتوگۆ)

هادی حەمەرەشید

برای بەڕێز کاك شوان محەممەد وتارێکی بەپێزی لەژێر ناوی (کاروان بەرەو پیرمام بەڕێوەیە) نووسیوە، بەجوانیی وێنای ئەو کاروان و ڕیزبەستنەی کردووە کە بەرەو (پیرمام) بەڕێوەیە، تایپ و جۆری کارەکتەرەکانی ئەو کاروانە، پۆلێن و ئەوانەشی کە لە ئایندەی نزیکدا ئەچنە ئەو ڕیزەوە شیمانە کراون.(لە کۆمێنت لینکی وتارەکە دائەنێم)

ساڵانێکە میدیای کوردیی خاڵیی نەبووە لەم جۆرە شیکارییانە، بەڵام ئێستا ئیتر هەل و مەرج و بلۆکبەندییەکە جیاوازیی قوڵ و چۆنایەتییان بەسەردا هاتووە، شوێنگۆڕکێ بەسەر پێکهاتەکاندا لەڕووی شەکڵییەوە هاتووە...تاد، بۆ ئێستا و وروژاندن و هێنانەوە گۆڕێی ئەو بابەتە گرنگە و پێویستە ببێتەوە بە باسی هەمووان.

چەندە گۆڕانکاریی بەسەر هەڵوێست و شوێنی لایەنەکاندا هاتووە، بەڵام ئەمە گۆڕانکارییەکی ڕووکار و شەکڵیی ململانێکەیە و ململانێی ڕاستەقینە لەنێوان دوو بەرەدایە نەك زیاتر، بەرەیەك کە هەموو هەوڵێك ئەدات لە خواردنی کێکی دەسەڵاتدا بەشداربێت و بێباکە لە نائومێدبوون و ئایندەی کۆمەڵگا، بەرەی دووەم خاوەنی ڕاستگۆیین لە هەمبەر دروشمگەلێك کە پێشتر هەڵیان گرتووە و دەستیان گرتووە بە هێشتنەوەی ئومێد و زیندووێتی کۆمەڵگا و خاڵیی نەبوون لە دەنگی دلێر.

یەکێك لە سیما دیارەکانی ڕیزبەندییە سیاسییەکەی ئەم قۆناغە، حەزی سەیری زۆربەی لایەنەکانە لەبەشداریی لە کابینەکەدا، بەپێچەوانەوە هەستکردن بە ڕق لێبوونەوەی لایەنەکانە لە بژاردەی ئۆپۆزسیۆن، بەجۆرێك کە دوو هێز ڕایانگەیاندووە ببنە ئۆپۆزسیۆن، بەڵام شتێکی جیاواز لەوانیتر ناکەن و ناڵێن و بیرناکەنەوە!

(پیرمام) وەك سەرچاوەی دروستکردنی بڕیار و بەخشینەوەی پشك و ئیمتیازات، ڕوونە قیبلەی کەسانێکە کە کاروانێکی تولانییان ڕوو بە ئەوێ ڕێکخستووە، بەڵام لەبەرامبەر ئەمەدا قیبلەکانیتر کەوتن، دەستەبژێرێك (یان ڕەنگە کۆمەڵێك دەستەبژێری جیاواز) لەسەروسەودای ژێربەژێر و هەندێ جاریش ئاشکرادا هەرەسیان بە قیبلە و ڕووگەکانیتر هێنا و بۆ خۆیشیان ملیان بەرەو پیرمام نەویکرد، بەڵام سروشتی ململانێ پێمان ئەڵێت: کۆتایی چیرۆكێك، سەرەتای لەدایکبوونی چیرۆکێکی نوێیە، حەتمەن بە تایبەتمەندیی خۆیەوە!

ڕەنگە دیارترین سیمای ململانێکانی ئەم قۆناغە بریتیی بێت لە بیرکردنەوە لە ڕێگرییکردن لە (بە مۆدێل بوونی چوون بەرەو پیرمام و چێژ وەرگرتن لەو بژاردەیە!) ئەمەش جگە لەوەی کە بەتوندیی سەرکۆنە بکرێت و نیشانەی پرسیار لەسەر هەڵپەی کارەکتەرە سیاسییەکان بۆ وەها کارێك دابنرێت و زوو زوو چێکی دروشم و بەڵێنەکانی پێشوویان و بەراوردکردنیان بەئێستا، هاوکات پێویستە دوو خاڵی زۆر گرنگ بکرێت بە تایتڵ بۆ خەباتی ئەم قۆناغە;

۱ـ تەحریم و تەجریم کردنی سیستمی بنەماڵەیی لە ئیدارەدانی حیزب و حکومەتدا، دژایەتییکردنی ئەم تایپە لە سیاسەتی ئێستا و خەباتکردن بۆ بنەبڕکردنی ئەم دیاردە قیزەونە لە ئایندەدا، چونکە هێزی سیاسی ئەکتیڤ و سرکە تا ئەوەی بۆ کەس و بنەماڵە و خێزانێك یەکلا ئەبێتەوە، ئیدی خۆبەخۆ ئەچێتە ناو هەمان سیستم(أنڤمە)ـی بارزانتاڵەبانەوە!

۲ـ هێنانەبوونی سەبك و ڕەوتارێکی عەقڵانیانە، بەڵام ڕادیکاڵ لە دژایەتییکردنی گەندەڵیی، چونکە دەرکەوت ئەوەی کە زۆرترین هات و هاواری کرد بۆ دژایەتی گەندەڵیی و تەنانەت سیستمی بنەماڵەییش ئیلخانیزادە ووتەنیی (دەم پڕ لە هەرا) بوون، ئەبێت نەوەیەك پێبگەیەنین نەك تەنیا یەك خول (بەناو) ئۆپۆزسیۆنی ئاوێزانی دەسەڵات بن، بەڵکو ساڵانێك نەیاری ئەو فەرهەنگە بن و خۆگربن، باج بدەن تا ئەم بارە گلاوەی ناو فەرهەنگی سیاسییمان ڕاست ئەکەنەوە، کە وەك ساندەویچ لە سیاسەت گەیشتووە و بەخێرایی و سەرپێیی ئەیەوێت لەبەرهەمەکەی بخوات، پێ بە پێ گۆڕانکاریی ڕیشەیی بکات.

هیچ یەك لەو دوو خاڵە ئەستەم نین، پێداویستیی قۆناغەکە و کڕیاریان لەناو هاوڵاتیاندا زۆرە، تەنیا نزیك کردنەوەی سپەیسەکان و چاوپۆشییکردن لە جیاوازییە شەکڵییەکان، بزانن کە لەشکری گەندەڵان کۆ و کۆکن و خاوەنی هاوپەیمانیی نووسراون و وا هاوڕاشن لەسەر قیبلەیەکی هاوبەش، کۆمەڵی دژەگەندەڵیی پەرتەوازە و ناکۆکن و هەر دەستە و تاقمێك بەرەو ئاراستەی جیاواز ڕووئەکەن!

09/03/2019