ئەو وێنەیە جارێکی تر گوزارشت لە هەقیقەتێکی تاڵ دەکات، دووپاتی دەکاتەوە کە قسەکردن لە ئازادی کاری میدیایی و سەروەریی دەسەڵاتی یاسا لە کوردستاندا وەک هەمیشە درۆیەکی گەورە و فریودانێکی قێزەونە.

زنجیرەکە ڕۆژبەڕۆژ درێژتر دەبێتەوە، زنجیرەی تێرۆرکردنی جەستەیی و مەعنەویی نوسەران و ڕۆژنامەنوسان، پاوانکردنی میدیای خوێندراو و بینراو و بیستراو لەلایەن حیزبەکانەوە، وشککردنی سەرچاوە داراییەکانی میدیای ئەهلی و فریودانی ڕۆژنامەنوسان بۆ کاری میدیایی لە کەناڵە حیزبیەکان و سێبەرەکانیاندا.

ئەڵبەت زنجیرەیەک کە بە کوشتن و بێدەنگکردنی ڕۆژنامەنوسان و نوسەران دەستپێبکات، لە دوا ئەڵقەدا دەبێتە زنجیری کۆتکردن و بێدەنگکردنی سەرجەم کۆمەڵگا.

بەڵام ئەوەی سەرنج دەدرێت لە دوای هەموو کەیسێک لە کەیسە زۆرەکانی کوشتن و شێوازە جیاوازەکانی تێرۆری قسە و نوسین لە کوردستاندا تەنها کۆمەڵێک بەیاننامەی ئیدانە و لێدوانی ناڕەزایی دەردەچن.

پاشان وردە.. وردە لەیاد دەکرێن و دەچنە ئەلبوومی یادە زۆرەکانی ئەم هەرێمەوە، کە توانای ئاساییکردنەوەی هەموو کەیسێکی نائاسایی هەیە.

تەنانەت لە هۆشیاریی نوسەران و ڕۆژنامەنوسان خۆشیاندا شۆک و ڕاچەنینی ڕاستەقینە دروست نابن، چونکە لەبری ئەوەی ویژدانی دەستەجەمعییان بەجۆرێک ببزوێت کە بایکۆتی میدیا حیزبیەکان و سێبەرەکانیان بکەن؛ کەچی ئەوانیش، پێبزانن یان نا، زۆرجار دەبنە بەشێک لە ئەجێندای ململانێی حیزبە ناکۆکەکان و خۆراکی میدیا سێبەرەکانیان و سوتەمەنی شەڕە سیاسیەکانیان، کە تەنها لە کاتی گەرمبوونی کێشە حیزبیەکاندا ئەو کەیسانە وەک کارتی گوشار لەدژی یەکتر دەجوڵێنن. لەوە بترازێت، لە کاتی دانوستان و دابەشکردنی بەرژەوەندیەکاندا ئەو کەیسانەش وەک هەموو کەیسە گرنگەکانی تری ئەم هەرێمە دیزەبەدەرخۆنە دەکرێن و وەک کۆمەڵێک دوروشمی پان و پۆڕ و تایتڵی بێ ناوەڕۆک دەمێننەوە