دروست ئێمە لە دنیایەكداین كە بە دڵمان نیە، لەبەردەم ئەزموونێكداین شكستی خواردووە و بێئیشەكان خەریكی پینە و پەڕۆكردنین. كاتی ئەوەیە قسە لەسەر فۆرمی ژیانی خۆمان بكەین، چ فۆرمێكمان دەوێت؟ دەبێت فۆرمی ئەو دنیایە چی بێت كە پیویستە دروستی بكەین؟ 

ئەو دنیایەی دەمانەوێت دەبێت قسە لەسەر هەموو شتێك بكەین و نابێت تابوی هەبێت. هیچ شۆڕشێك بێ قسەكردن لەسەر دین بێ جیهانبینی نوێ بۆ دین و ڕیفۆرم لە دین بوونی نیە، هەڵهاتنی خۆری دنیایەكی نوێ بەبێ قسەكردن لەسەر كۆی پیرۆزیەكان دنیایەكی تاریكە.

بەر لە هەر شت دەبێت خۆت بیت. ئەوە تۆی بەچكە بەرپرسێك دەبنی سێڵفی لەگەڵ دەگری، تۆ تا نەگەیتە ئەو قەناعەتەی كە تۆش وەك ئەوانی تری، تۆ تا نەگەیتە ئەو بڕوایەی كەس لە تۆ جیاوازتر نیە، قسە لە دنیایەكی تر كەلێنی گەورەی تیایە.

 ئەی هەژاران لە برسا ڕادەپەڕن؟ ئێ خۆ بەچكە چۆلەكەش برسی بێت هەر هاوار دەكات، كێشە لە شوێنێكی ترە. ئەی هەژاران ئێوە نەبوون لە 17ی شوبات بەردتان لە بارەگای ستەمكارەكان دەگرت و نانبڕاو دەكران و چەكدارەكان كۆڵان بە كۆڵان دواتان دەكەوتن، ئەی پێم بڵێ دوایی كێ بوو بە مدیر عام و ڕاوێژكار و وەزیر و پارلەمانتار؟ بە گومانەوە بجوڵی، ئەگەر دنیات بە دڵ نیە بیر لە دنیای داهاتوو بكەرەوە بە گومانەوە، بەچكە بەراز بەسەر خۆتەوە مەكە بە بەرپرس.  

بیر بكەرەوە، كەس بەرپرسێكی كوردی بینیوە كچەكەی لەسەر عەشق بكوژێت؟ ئەوە تۆی بە ژنكوژ ناسراوی، تۆڵەی بەرپرسەكان لە منداڵەكانت دەكەیتەوە، سەختە ژنكوژ شۆڕشی پێ بكرێت. 

تۆ لەو مەخلوقانە مەبە دڵخۆش بیت ئومەتێك بە بێ خوێندنەوە بتوانێت دەسكاری دنیا بكات، لەو مەعدەنە مەبە باوەڕ بە كۆمەڵگەیەك بكەی ئامادە بێت بە سەعات گوێ لە پیاوێكی دینی بگریت كە دەڵێت نابێت بەبەرچاوی خەڵكەوە ئافرەت مۆز بخوات.  تۆ ترست لە هاتنی داعش هەیە، بەڵام ترست نیە لە عەقڵی داعش كە لە تەنیشتی خۆتەوەیە، لە مینبەری مزگەوتەكاندایە، لە جەستەی گەنجێكی سەلەفیدایە.  

هیچ هێزێك نیە بتوانێت بەبێ فۆرمێكی نوێ لە ئەدەب و هونەر و گەڕانەوەی زەوق بۆ هونەر بتوانێت یەك سانتیمەتر قەزیەی ئێمە بباتە پێشەوە. هیچ هیزێك نیە بتوانێت گۆڕان دورست بكات گەر بڕوای بە جیاوازی ڕەگەزی هەبێت. یەك گەرد لە داڵتایە بەرامبەر بە ڕەگەزی مێینە و شەرەفی خۆت لای مێینەكانت دەبینیتەوە، ئەوە هەرگیز جورئەت نەكەی قسە لە دنیایەكی نوێ بكەی.

گەر تاكە قسەت ئەوەیە جێ بە ستەمكاران چۆڵ بكەی و وەك ئەوانیش ڕەفتار بكەی ئەوە دەبێت لە ئێستاوە خۆت بۆ هاتنی ستەمكارێكی تر ئامادە بكە. دەبێت تەفسیری ترت هەبێت بۆ دەسەڵات، بۆ مادە و بۆ دەوڵەمەندی، بۆ شوێن و بۆ ڕاقیەت، بۆ ژیان و عەشق. ژیان بریتیە لە كار و عەشق، بەبێ عەشق شتێك نیە ناوی شۆڕش بێت، بەبێ كار، قسەكردن لەسەر دەسكاریكردنی ئێستای دنیا جگە لە دووبارەبوونەوەی ئێستا چیتر نیە.

ئەگەر تەماشای سەربڕینی مەڕێك بكەیت و دڵت خورپە نەكات، ئەوە ڕۆحیەتی گۆڕانكاری لەتۆدا مردووە، ئەگەر هەست بە تیژی ساچمەكەك نەكەی كە چۆلەكەیەك تیرۆر دەكات، ئەوە لە ئێستاوە تۆ جەستەیەكی مردویت و ناتوانیت ژیانی خۆت دەسكاری بكەیت. تۆ تا ئێستا سەگ ببینیت بەردی تێ دەگری، كوێی دنیای ئێمە دەسكاری دەكەی؟ دەسكاریكردنی ژیانی تۆ ئازایەتی دەوێت، تێكی مەدە و بە چارەڕەشی خۆتەوە دانیشە، گۆڕینی دنیا هەم عەشقی دەوێت و هەم كار، هەم مرۆڤی دەوێت و هەم خەیاڵ. 

تۆ ئێستاش شەرم دەكەی دەستی منداڵەكانت بگریت و بچیتە سینەما، ئێستاش بۆ بینینی شانۆگەریەك كاتی خۆت ناكوژی، تۆ ئێستاش كە منداڵتان دەبێت و كچ بێت چارە كرژ دەكەی. ئێستاش شانازی بە عەشیرەتەوە دەكەی. تۆ ئێستاش دەچی بۆ ڕاو تەقە لە ئاسك دەكەی، كەو و كۆتر لە ترسی تۆ لە چیاكانیش جێگەیان نابێتەوە،  تۆ ئێستاش كوڕەكەت دڵداری بكا شانازی دەكەی، كچەكەت مەسجێك بۆ بنێریت وا دەزانی شەرەفت ڕۆیشتووە. 

ئەوەندە بەس نیە بڵێی دەسەڵات خراپە، تۆ بەم جەستە بەتاڵەتەوە ناتوانی دەسەڵاتێكی باشتر بنیاد بنێی. ئەوەندە بەس نیە بڵێی برسیمە، باڵندەكان لە ترسی مرۆڤ ناچنە سەر دانەوێڵەكە، چونكە ئەوان ئازادیان لا گرنگترە لە نان. تۆ بیست و پێنچ ساڵە تەحەملی ئەم هەموو بێحورمەتیەت كردووە، ماقوڵە ئێستا قەناعەتم پێ بكەی كە دەبێت شتێ بكرێ؟ چی بكرێ؟ تۆ خۆت بۆ دنیایەكی باشتر ئامادە كردووە، یان وەك ئەریك فرۆم دەڵێت لە ئازادی دەترسیت؟ تۆ ئێستاش تەنها چوار دیواری ماڵەكەت بە هێلانەی خۆت دەزانیت، تۆكڵە مۆز و دەبەی ئاو لە جامی سەیارەكەتەوە فڕێ دەدەی، ئێستاش ئامادە نیت سبەینانێك گوێ لە موسیقایەكی خاو ڕادێریت.

گیانی شۆڕشگێڕی سەركێشی دەوێت، بیست و پێنچ ساڵە شكۆت دەشكێنرێت، دنیایەكی نوێ  بە شكۆشكێنراوەكان دروست ناكرێت.